चिनियाँ खोप भोलिदेखि, ४० देखि ५९ वर्षकालाई लगाइने

काठमाडौं– चीनबाट प्राप्त कोरोनाविरुद्धको खोप भेरोसेल भोलि (मंगलबार) देखि लगाउन सुरु गरिने भएको छ।

यो खोप ४० देखि ५९ वर्ष उमेर समूहका व्यक्तिलाई दिन लागिएको हो। स्वास्थ्य तथा जनसंख्या मन्त्रालयले चैत ३१ देखि वैशाख ५ सम्म उक्त उमेरसमूहका व्यक्तिलाई खोप दिने तयारी गरेको छ। यसअघि सरकारले २५ चैतदेखि केही निश्चित समूहका व्यक्तिका लागि मात्रै यो खोप उपलव्ध गराएको थियो। 

स्वास्थ्य सेवा विभाग परिवार कल्याण महाशाखा अन्तर्गतको खोप शाखा प्रमुख डा. झलक गौतमका अनुसार ४० देखि ५९ वर्ष उमेर समूहका आम सर्वसाधारणलाई भेरोसेल खोप दिइने निर्णय भएको छ। 

उनले पहिले प्राथमिकतामा परेका समूहले पनि सो खोप लगाउन सक्ने स्पष्ट पारे। यसअघि यो खोप १८ देखि ५९ वर्ष उमेर

समूहका प्राध्यापक, चीनमा छात्रवृत्तिमा अध्ययन गर्ने विद्यार्थीहरु, चीनमा अध्ययन गर्न जाने तयारीमा रहेका व्यक्ति, अत्यावश्यक सेवामा काम गर्ने कर्मचारी, होटल, ट्रेकिङ, विज्ञापन र इन्टरनेट क्षेत्रमा काम गर्ने व्यक्ति, औषधि, फलफूल, तरकारीलगायतका व्यापारीलाई लगाइएको थियो।