भ्रष्टाचार छानबिन गर्ने लेखामा भ्रष्टाचारकै आरोपित बाँस्कोटा बने सदस्य

काठमाडौं- भ्रष्टाचार लगायतका अनियमितता छानबिन गर्न सक्ने कार्याधिकार पाएको संसदीय समितिमा भ्रष्टाचारको आरोप लागेका सांसदलाई सदस्य बनाइएको छ।

सेक्युरिटी प्रेस खरिदमा ७० करोड कमिसनका लागि लबिङ गरेको अडियो सार्वजनिक भएपछि सञ्चार तथा सूचना प्रविधि मन्त्रीबाट राजीनामा दिएका गोकुल बाँस्कोटालाई सदस्य बनाइएको हो। 

सोमबारको प्रतिनिधि सभा बैठकमा सभामुख अग्निप्रसाद सापकोटाले गोकुल बाँस्कोटालाई सार्वजनिक लेखा समितिको जिम्मेवारी दिन प्रस्ताव गरेका थिए। उक्त प्रस्तावलाई बैठकले पारित गरेको छ। 

बाँस्कोटाविरुद्ध अख्तियार दुरुपयोग अनुसन्धान आयोगमा उजुरी दर्ता छ। सुनसरीका प्रितम सुवेदी र दोलखाका विजयबाबु शिवाकोटीले बाँस्कोटाविरुद्ध गतवर्ष फागुन ११ गते अख्तियारमा उजुरी दर्ता गराएका हुन्।

विभिन्न सरकारी ठेक्कामा बाँस्कोटाले हस्तक्षेप गरेकोले ती ठेक्काबाट अनुचित लाभ लिएको हुनसक्ने भन्दै छानबिनका गरी कारबाही अघि बढाउन उजुरीमा माग गरिएको छ।