कोरोना खोपको असन्तुलित वितरणप्रति डब्ल्युएचओको आपत्ति

एजेन्सी- विश्व स्वास्थ्य संगठन डब्ल्युएचओले धनी र गरिब देशबीच कोरोना खोपको असमान वितरणलाई लिएर आपत्ति प्रकट गरेको छ।

डब्ल्युएचओका प्रमुख टेड्रोस एडहानोम घेब्रेयससले यसलाई ‘आश्चर्यजनक असन्तुलन’ भनेका छन्।
उनले शनिबार सबै देशमा खोप अभियान सुरु होला भन्ने आफ्नो अनुमान रहे पनि यस्तो हुन नसकेको भन्दै आश्चर्य प्रकट गरे।

गरिब मुलुकहरुले कोरोना भाइरसविरुद्धको खोप पाउनु पर्छ भनेर विश्व स्वास्थ्य संगठनले कोभ्याक्स अभियान सुरु गरेको थियो। यसको माध्यमबाट संगठनले अहिलेसम्म एक सय देशमा ३ करोड ८० लाख डोज खोप पठाइसकेको छ।

योजनाअनुसार कोभ्याक्स कार्यक्रमका माध्यमबाट १९० देशका मानिसलाई कोरोनाको २ अर्ब डोज बाँड्ने डब्ल्युएचओको तयारी छ। यसमा खासगरी ९२ गरिब मुलुकलाई अन्य धनी देशहरुले नै खोप दिइरहेका बेला खोप दिने योजना डब्ल्युएचओको हो।

घेब्रेयससले भनेका छन्, ‘विश्वस्तरमा धनी र गरिब देशबीच कोरोना खोपको वितरणमा आश्चर्यजनक असन्तुलन भयो। खोप वितरणको सामान्य अभ्यासलाई हेर्ने हो भने धनी देशमा हरेक ४ जनामा एकजनालाई खोप प्राप्त भएको छ। तर गरिब देशमा ५०० जनाभन्दा बढीमध्ये १ जनालाई खोप प्राप्त भएको छ।’

खोप संकलनका लागि धनी देशहरुको होडबाजीलाई लिएर उनले कोभ्याक्स कार्यक्रममा सहभागी हुनुको कारण आफ्नो राजनीतिक र व्यापारिक हितलाई हेरेर केही देश र केही कम्पनीहरुले खोपका लागि द्वीपक्षीय सम्झौता पनि गरेको बताए। यसले खोपको असमान वितरणलाई अझै बढाएको औंल्याएका छन्।