प्रदेश २ मा कोरोना : सक्रिय संक्रमितको संख्या सय नाघ्यो

जनकपुरधाम- छिमेकी देश भारतमा कोरोना संक्रमण बढिरहेको समयमा प्रदेश २ मा समेत कोरोना संक्रमितहरुको संख्या बढ्न थालेको छ।

प्रदेश २ मा कोरोनाका सक्रिय संक्रमितको संख्या पुनः १०० नाघेको छ। शनिवार मात्रै थप १५ जनामा कोरोना संक्रमण पुष्टि भएसँगै कोरोना सक्रिय संक्रमितको संख्या १०७ पुगेको स्वास्थ्य निर्देशनालय प्रदेश २ का निमित्त निर्देशक विजय कुमार झाले जानकारी दिए।

पछिल्लो २४ घण्टामा ३७ जनाको पीसीआर परीक्षण गर्दा १५ जनामा कोरोना संक्रमण पुष्टि भएको स्वास्थ्य निर्देशनालय प्रदेश २ का वरिष्ठ चिकित्सक डा कमलेश प्रसाद यादवले बताए। 

शनिवार बारामा ५ र पर्सामा १० जनामा कोरोना संक्रमण पुष्टि भएको छ। यससँगै प्रदेश २ मा कोरोेना संक्रमितको संख्या १७ हजार ३१४ पुगेको छ। 

हाल पर्सामा सबैभन्दा बढी ५५ जना सक्रिय संक्रमित छन्। त्यस्तै बारामा ३१, धनुषामा १२, महोत्तरीमा ४, सर्लाहीमा २, सप्तरी, सिरहा र रौतहटमा १÷१ जनामा कोरोना संक्रमण पुष्टि भएको हो।