गरिब राष्ट्रहरूमा २०२१ को सुरुबाटै कोरोनाविरुद्धको खोप पठाउन थालिने

जेनेभा- गरिब राष्ट्रहरूमा सन् २०२१ को सुरुदेखि नै कोरोनाविरुद्धको खोप पठाउन थालिने विश्व स्वास्थ्य संगठन (डब्ल्यूएचओ) ले शुक्रबार जनाएको छ।

डब्ल्यूएचओ र त्यसका साझेदारहरूले कोभ्याक्सलगायतका खोप शीघ्र उपलब्ध हुन सक्ने बताएका हुन्। उनीहरूले सबैलाई पुग्ने गरी बनाउने तयारी भइरहेको जनाएका छन्। 

विश्व समुदायका लागि झण्डै दुई अर्ब मात्रा खोप सुरक्षित गर्न लागिएको स्वास्थ्य निकायका अधिकारीहरूले जानकारी दिएका छन्।  

संगठनले जारी गरेको वक्तव्यमा लेखिएको छ, “सबै देशले कोरोनाविरुद्धको खोप किनेर लैजान सक्दैनन्, ती देशहरूमा पनि सन् २०२१ को सुरुदेखि नै खोप पठाइने छ।”

अँध्यारो सुरुङमा पनि थोरै उज्यालो हुन्छ भने झैँ महामारीका बेला पनि गरिब मुलुकलाई कोरोनाविरुद्धको खोप उपलब्ध गराउने प्रयास भइरहेको डब्ल्यूएचओका प्रमुख टेड्रोस अधानोम गेब्रेयससले जानकारी दिए। रासस