मोरङमा थप दुई कोरोना संक्रमितको मृत्यु

मोरङको लेटाङ र रतुवामाईका दुई जना कोरोना संक्रमितको मृत्यु भएको छ।

नेपाल समय | बिहीबार, मंसिर ११, २०७७

नेपाल समय

बिहीबार, मंसिर ११, २०७७

विराटनगर– मोरङको लेटाङ र रतुवामाईका दुई जना कोरोना संक्रमितको मृत्यु भएको छ।

नोबेल शिक्षण अस्पताल विराटनगरमा लेटाङ नगरपालिका–२ का ७० वर्षीय वृद्धको बिहीबार बिहान ज्यान गएको छ। अस्पतालका प्रबन्धक नारायण दाहालका अनुसार पीसीआर परीक्षण गराउँदा रिपोर्ट पोजिटिभ आएपछि मंसिर ९ गते मंगलबार उपचारका लागि वृद्धलाई भर्ना गरिएको थियो।

रतुवामाई नगरपालिका–८ का कोरोना संक्रमित ८० वर्षीय वृद्धको बुधबार राति होम आइसोलेसनमै मृत्यु भएको छ। रतुवामाई नगरपालिकाका प्रमुख रविन राईले कोरोना पुष्टि भए पनि आफ्नै घरमा बसिरहेका वृद्धको राति १० बजेतिर ज्यान गएको जानकारी दिए।

उनका अनुसार सामान्य रुघा खोकी लागेपछि वृद्धको पीसीआर परीक्षण गराउँदा मंसिर १ गते रिपोर्ट पोजेटिभ आएको थियो। कोरोना पुष्टि भए पनि सामान्य अवस्थाका कारण होम आइसोलेसनमै रहेका वृद्धको अचानक स्वास्थ्यमा समस्या देखिएको र उपचारका लागि लैजान नपाउँदै ज्यान गएको राईले बताए।

प्रकाशित: Nov 26, 2020| 07:44 बिहीबार, मंसिर ११, २०७७