कोरोना संक्रमितले लोकसेवाको परीक्षा दिन नपाउने

काठमाडौँ- कोरोना भाइरसको संक्रमण तीव्र गतिमा फैलिरहँदा लोकसेवा आयोगले परीक्षा लिने तयारी गरेको छ । 

सरकारले नयाँ विज्ञापन खुलाउन तथा रोकिएको परीक्षा सञ्चालनका लागि आग्रह गरेपछि आयोगले परीक्षा लिने तथा नयाँ विज्ञापन खोल्ने तयारी गरेको हो ।

आयोगले आफ्नो तयारीसँगै कोरोना संक्रमित परीक्षामा सहभागी हुन नपाउने गरी मापदण्ड तयार गरेको छ। परीक्षा सञ्चालन तथा व्यवस्थापनसम्बन्धी मापदण्ड जारी गर्दै आयोगले कोरोना संक्रमित र आइसोलेसनमा बसेका व्यक्तिहरूले परीक्षा दिन नपाउने जनाएको हो।

परीक्षामा सहभागी परीक्षार्थी तथा परीक्षामा खटिने जनशक्तिले अनिवार्य रूपमा मास्क लगाउने, सेनिटाइजर प्रयोग गर्ने, भौतिक दूरी कायम गर्नुपर्ने मापदण्डमा उल्लेख छ । यस्तै विद्यार्थी स्वयंले आफूलाई संक्रमण भए-नभएको घोषणा गर्नुपर्ने लगायतका नियमहरु बनाइएका छन् । 

आयोगले एउटा परीक्षा केन्द्रमा एक सय जना मात्रै परीक्षार्थी राख्ने भएको छ भने एक बेन्चमा एक जना मात्रै बस्ने गरी एउटा हलमा २५ जना परीक्षार्थी राखिने भएको छ । 

गत वैशाखदेखि रोकिएको लोक सेवाको विज्ञापन तथा परीक्षा यसै महिना सुरु हुँदै छ । 

असोजमा सहसचिव र उपसचिव, कात्तिकमा प्रशासनको शाखा अधिकृत, मंसिरमा प्राविधिकतर्फको शाखा अधिकृत र त्यसपछि क्रमशः नायव सुब्बा तथा खरिदारलगायत पदको विज्ञापन निकाल्ने आयोगले जनाएको छ । 

पहिलो चरणको परीक्षा सम्पन्न भएर परिणामसमेत आइसकेका विभिन्न तहको दोस्रो चरणको लिखित परीक्षासमेत आयोगले चाँडै थाल्ने भएको छ ।