झनै फैलियो कोरोना, विश्वभर एकैदिनमा साढे ३ लाख संक्रमित

काठमाडौं- विश्वभर कोरोना भाइरसको संक्रमण झनै तिब्र गतिमा फैलिएको छ । 

पछिल्लो तीन दिन लगातार ३ लाख ५० हजारभन्दा बढी ब्यक्ति कोरोना भाइरसबाट संक्रमित भएका छन् भने दिनहुँ ५ देखि ६ हजारभन्दा धेरैले ज्यान गुमाएका छन् । 

पछिल्लो २४ घण्टामा (शनिबार) मात्रै ३ लाख ५३ हजार १ सयभन्दा धेरै ब्यक्ति संक्रमित भएका छन् भने ५ हजार १० जनाले ज्यान गुमाएका छन् । 

शुक्रबार एकै दिनमा अहिलेसम्मको सबैभन्दा धेरै ३ लाख ५८ हजार ५ सयभन्दा बढी ब्यक्ति कोरोनाबाट संक्रमित भएका थिए । ५ हजार ८ सय ६ जनाको मृत्यु भएको थियो । 

त्यस्तै बिहीबार ३ लाख ४९ हजार ३ सयभन्दा धेरै संक्रमित थपिएका थिए भने ६ हजार ४ सय २० जनाको मृत्यु भएको थियो । 

पछिल्लो केहि दिन यता विश्वभर कोरोना संक्रमणको दर ह्वात्तै बढेको छ । युरोपेली मुलुकमा कोरोना संक्रमणको दोस्रो लहर देखिएसँगै विश्वभर कोरोनाको ग्राफ उकालो लागेको हो । 

लकडाउन खोलेसँगै विश्वका धेरै मुलुकमा कोरोनाको संक्रमण उच्च बिन्दुमा पुगेको छ । नेपालमा मात्रै लकडाउन खुलेसँगै कोरोनाको संक्रमणदर दशौं गुणाले बढेको छ । 

हाल विश्वभर कोरोनाबाट ३ करोड ७० लाख ८७ हजारभन्दा धेरै संक्रमित भएका छन् भने १० लाख ७१ हजार ३ सय ९९ जनाको मृत्यु भएको छ। 

शनिबार कुन देशमा कति संक्रमित थपिए ? 

पछिल्लो २४ घण्टामा अमेरिकमा ५० हजार ८ सय ७६, भारतमा ७४ हजार ५ सय ३५, ब्राजिलमा ३४ हजार ६ सय ५०, रुसमा १२ हजार ८ सय ४८, कोलम्बिया ८ हजार ४ सय ४७ जना संक्रमित थपिएका छन् । 

यस्तै अर्जेन्टिनामा १२ हजार ४ सय १४, फ्रान्समा २६ हजार ८ सय ९६, बेलायतमा १५ हजार १ सय ६६, इटालीमा ५ हजार ७ सय २४, युक्रेन ५ हजार ७ सय २८, नेपालमा ५ हजार ८ जनामा संक्रमण पुष्टि भएको छ ।