भेरीमा कोरोना संक्रमित थप दुई जनाको मृत्यु 

बाँके- बाँकेको नेपालगञ्जस्थित भेरी अस्पतालमा उपचाररत दुई जना कोरोना सङ्क्रमितको गए राति मृत्यु भएको छ। 

नेपालगञ्ज उपमहानगरपालिका १० ट्राफिक चोक निवासी ८४ वर्षीय पुरुष र कोहलपुर नगरपालिका ८ का ७१ वर्षीया महिलाको उपचारका क्रममा गए राति मृत्यु भएको स्वास्थ्य कार्यालय बाँकेका कोरोना स्रोत व्यक्ति नरेश श्रेष्ठले जानकारी दिए।  

उनका अनुसार नेपालगञ्जस्थित भेरी अस्पतालको कोरोना आइसोलेसन वार्डमा उपचाररत पुरुषको शनिबार राति करिब १० बजे मृत्यु भएको थियो। 

त्यसको पाँच मिनेटको फरकमा महिलाको मृत्यु भएको थियो। श्वासप्रश्वासमा समस्या देखिएपछि पिसिआर परीक्षण गर्दा पुरुषमा गत असोज ६ गते र महिलामा १४ गते कोरोना सङ्क्रमण देखिएको थियो।

दुवै जनालाई भेरी अस्पतालको कोरोना आइसोलेसन वार्डमा भर्ना गरेर उपचार गरिए पनि बिरामीको मृत्यु भएको स्रोत व्यक्ति श्रेष्ठले बताए। 

योसहित बाँके जिल्लामा कोरोना सङ्क्रमणबाट मृत्यु हुनेको सङ्ख्या २६ पुगेको छ। बाहिरी जिल्लाबाट उपचारको क्रममा बाँकेमा आई मृत्यु हुनेको सङ्ख्या १२ पुगेको छ। बाँकेको भेरी अस्पतालमा आठ र शिक्षण अस्पताल कोहलपुरमा १२ गरी २० जना सङ्क्रमित सिकिस्त अवस्थामा रहेको पनि श्रेष्ठले जानकारी दिए।