कमेरो खन्न गएका युवा दुधकोशीमा बेपत्ता

सोलुखुम्बु- कमेरो माटो खन्न गएका युवा दुधकोशी खोलाले बगाएर बेपत्ता भएका छन्। 

थुलुङ दुधकोशी गाउँपालिका ४ जुबु खन्याखर्कका २३ वर्षीय सन्तोष घिमिरे शनिबार बेपत्ता भएका हुन्।

जिल्ला प्रहरी कार्यालय सोलुखुम्बुका प्रहरी निरीक्षक महेन्द्र दर्नालका अनुसार श्रीमतीसँगै घर लिप्ने कमेरो माटो खन्न गएका घिमिरेलाई शनिबार बिहान खोलाले बगाएको हो। 

माटो खनिसकेर भारीसमेत मिलाइसकेका घिमिरेले श्रीमतीलाई पानी पिउन मन लागेको भन्दै ज्याकेट र मोबाइल दिएर दुधकोशीमा गएका थिए। 

पानी पिएपछि पौडन नदीमा पसेका उनलाई नदीले बगाएको प्रत्यक्षदर्शीले बताएका छन्। उनको खोजी कार्य जारी रहेको प्रहरीले जनाएको छ।

यता थुलुङ दुधकोशी गाउँपालिका ९ लोखीममा नवजात शिशुको बेवारिसे शव भेटिएको छ। सालनालसहित कुहिसकेको अवस्थामा नवजात शिशु छोरीको शव भेटिएको जिल्ला प्रहरी कार्यालय सोलुखुम्बुका प्रहरी निरीक्षक महेन्द्र दर्नालले जानकारी दिए।

लोखीमको सार्कु खोलाको छागाँमा माछा मार्न गएका स्थानीयले शनिबार दिउँसो शिशुको शव देखेपछि प्रहरीलाई खबर गरेका थिए। 

नवजात शिशुको शवपरीक्षण लागि जिल्ला अस्पताल फाप्लु ल्याएको सोलुखुम्बु प्रहरीले जनाएको छ। घटनाको विषयमा अनुशन्धान भइरहेको छ।