मोरङ र सुनसरीका दुई जना कोरोना संक्रमितको विराटनगरमा मृत्यु 

विराटनगर- मोरङको रंगेली र सुनसरी धरानका कोराना संक्रमित दुई पुरुषको नोबेल शिक्षण अस्पताल  विराटनगरमा मृत्यु भएको छ। 
 
अस्पताल प्रबन्धक नारायण दाहालका अनुसार मोरङको रंगेली नगरपालिका ४ का ७२ वर्षीय संक्रमित पुरुषको बिहीबार राति साढे नौ बजे मृत्यु भएको हो।

बुधबार बिहान अस्पताल ल्याइएका उनको आइसोलेसनमा उपचार भइरहेको थियो। श्वासप्रश्वासमा समस्या भएकोभन्दै गम्भीर अवस्थामा ल्याइएका पुरुषलाई तत्काल आईसीयूमा भर्ना गरेर उपचार थाल्दै पिसीआर गर्दा कोरोना भाइरस संक्रण देखिएको थियो।  
 
त्यस्तै सुनसरीको धरान उपमहानगरपालिका १२ का ४५ वर्षीय कोरोना संक्रमित पुरुषको शुक्रबार बिहान ७ बजेतिर मृत्यु भएको प्रबन्धक दाहालले बताए। 

उनका अनुसार श्वास फेर्न गाह्रो हुने र फोक्सोमा संक्रमणको समस्या भएका पुरुषलाई असोज १७ गते उपचारका लागि भर्ना गरिएको थियो। 
 
दुवै शवको व्यवस्थापन नियम अनुसार हुने उनको भनाइ छ।