संक्रमणमा नयाँ रेकर्ड, आज थपिए ४ हजार ३६४ संक्रमित

काठमाडौं- पछिल्लो २४ घण्टामा नेपालमा थप ४ हजार ३६४ जनामा कोरोना संक्रमण पुष्टि भएको छ। यो एकै दिनमा थपिएको हालसम्मकै उच्च संख्या हो। योसँगै नेपालमा कोरोना संक्रमितको कुल संख्या ९८ हजार ६१७ पुगेको छ।

पछिल्लो २४ घण्टामा १८ हजार ४७३ जनाको पीसीआर परीक्षण गरिएको छ। हालसम्म ११ लाख ३१ हजार ९५८ जनाको पीसीआर परीक्षण गरिएको स्वास्थ्य तथा जनसंख्या मन्त्रालयले जानकारी दिएको छ।

त्यस्तै देशमा सक्रिय संक्रमितको संख्या २६ हजार ६८४  पुगेको छ। जसमध्ये ११ हजार ७१७ जना संस्थागत आइसोलेसनमा र १४ हजार ९६७ जना होम आइसोलेसनमा छन्।

४ हजार ४६० जना क्वारेन्टिनमा रहेको मन्त्रालयले जनाएको छ।

पछिल्लो २४ घण्टामा २ हजार ६७५ जना कोरोना संक्रमणमुक्त भएका छन्। योसहित हालसम्म ७१ हजार ३४३ जना व्यक्ति कोरोनामुक्त भइसकेका छन्।

पछिल्लो २४ घण्टामा १२ जनाको कोरोना संक्रमणबाट मृत्यु भएको छ। यो सहित नेपालमा कोरोना संक्रमणबाट मृत्यु हुनेको संख्या ५९० पुगेको छ।