पोखरा– पोखरामा बुधबार राजावादीहरुले मोटरसाइकल जुलुस निकालेका छन्। ‘राजा आऊ देश बचाऊ’ भन्ने नारा लगाउँदै हजारौंको संख्यामा पोखरेलीले जुलुस निकालेका हुन्।
जुलुसमा सहभागीले पञ्चायत र बहुदलकालीन राष्ट्रियगान ‘श्रीमान् गम्भीर नेपाली’, ‘हिमाल झैं अटल यो’ जस्ता गीत गाएका थिए । ‘गणतन्त्र मुर्दावाद’, ‘हिन्दू राज्य कायम गर’, ‘जय देश, जय नरेश’ जस्ता नारा लगाइएको थियो ।
शिवसेना नेपालको नेतृत्वमा जुलुस निस्किएको हो । अमरसिंह चोकबाट सुरु भएको जुलुस सिद्धार्थचोकमा पुगेर कोणसभामा परिणत भएको थियो । कोणसभालाई शिवसेना नेपालका अध्यक्ष अशोक बस्नेतले सम्बोधन गरेका थिए ।
सम्बोधनमा बस्नेतले अहिलेका राज्यसञ्चालक विदेशीबाट परिचालित भएको आरोप लगाएका थिए । ‘आजसम्मका आन्दोलन विदेशी प्रभावमा गराइयो, विदेशीबाट चलेकालाई हटाएर देशको संरक्षणमा राजा फर्काउनुपर्छ,’ उनले भने, ‘नेपालीले राजाको महत्व बुझिसके, १४ वर्षमै देश डुब्न लागिसक्यो ।’
देशभर राजावादीले जुलुस निकालिरहेका छन् । बुधबार जनकपुरमा समेत राजावादीले जुलुस निकालेका थिए । गणतन्त्रले नेपालीलाई सास्ती दिएको र राजतन्त्रको पुर्नबहाली हुनुपर्ने मागसहित उनीहरुले बेलाबखत सडक तताउने गरेका छन् ।
