सप्तरीमा एक कोरोना संक्रमितको मृत्यु

सप्तरी- सप्तरीमा कोरोना संक्रमणबाट थप एक पुरुषको मृत्यु भएको छ। मृत्यु हुनेमा तिलाठी कोइलाडी गाउँपालिका ५ का ६८ वर्षीय पुरुष रहेका गाउँपालिका अध्यक्ष सतिशकुमार सिंहले जानकारी दिए।

उनका अनुसार ती पुरुष निमोनियको समस्या भएपछि ६ दिनअघि न्यूरो अस्पताल विराटनगरमा भर्ना भएका थिए। उनको उपचारका क्रममा आज (शुक्रबार) मृत्यु भएको हो। 

यसअघि भक्तपुर अस्पतालमा उपचाररत सप्तरीका ४८ वर्षीय पुरुषको हिजो साँझ संक्रमणबाट मृत्यु भएको थियो।

खोकी र श्वासप्रश्वासमा समस्या देखिएपछि यही असोज १२ गते अस्पतालमा भर्ना भएका उनको कोरोना परीक्षण गर्दा पोजिटिभ देखिएको अस्पतालका सूचना अधिकारी डा. सुनिल ढुंगेलले जानकारी दिए।

संक्रमण पुष्टि भएपछि भेन्टिलेटरमा राखेर उपचार भइरहेका पुरुषमा निमोनिया र मधुमेहको समेत समस्या देखिएको जनाइएको छ। सप्तरीमा मृत्यु हुनेको संख्या १८ जना पुगेको स्वास्थ्य कार्यालयले जनाएको छ। रासस