काभ्रेमा २८ वर्षीय युवकको कोरोनाबाट मृत्यु, दाहसंस्कार गरेपछि संक्रमण पुष्टि

धुलिखेल- काभ्रेको महाभारत–२ गोकुलेका २८ वर्षीय युवकको कोरोनाको संक्रमणबाट मृत्यु भएको छ । 

कुनै दिर्घ रोग नभएका उनलाई ३/४ दिनदेखि ज्वरो आएपछि हेलिकोप्टरबाट ल्याएर धुलिखेल अस्पतालमा भर्ना गरिएको थियो । विकट मानिने डाँडापारि क्षेत्रबाट हेलिकप्टरमा ल्याएर अस्पताल ल्याएको केहि समयमै बुधबार उनको मृत्यु भएको अस्पतालले जनाएको छ । 

ज्वरोलगायत समस्या देखिएपछि ३–४ दिनदेखि खानीखोला गाउँपालिका–४ स्थित एक मेडिकलमा उनको उपचार गरिएको थियो । अझै गह्रो भएपछि हेलिकप्टरमार्फत अस्पताल ल्याएको उनका आफन्तलाई उधृत गर्दै अस्पतालले जनाएको छ । 

मृत्युपछि आएको रिपोर्टमा उनमा कोरोना पुष्टि भएको हो । मृतक युवकको कोरोना परिक्षण गराउन समेत आनाकानी गरेका आफन्तले शव आफैले लिएर गएका थिए । परिवारले पनौतीमा युवकको अन्तिम संस्कार गरेको छ ।

अन्तिम संस्कारपछि कोरोनाको रिपोर्ट पोजिटिभ आएपछि युवकको सम्मर्कमा आएकाहरुको स्वाव संकलनका काम भइराखेको महाभारत गाउँपालिका अध्यक्ष कान्छालाल जिम्वाले जानकारी दिए ।