एम्बुलेन्सबाट झार्दाझार्दै कोरोना संक्रमितको मृत्यु

विराटगनर–झापाका एक कोरोना संक्रमितको विराटनगरमा मृत्यु भएको छ। 

थप उपचारका लागि कोशी अस्पताल कोभिड–१९ उपचार केन्द्र विराटनगर ल्याइएका कनकाई ९ का ४७ बर्षीय पुरुषको शनिबार राती पौने ११ बजे मृत्यु भएको अस्पतालका व्यवस्थापक ज्ञानबहादुर बस्नेतले जानकारी दिए। 

उपचारका लागि आइसोलेसनमा लैजानका लागि एम्बुलेन्सबाट झार्दाझार्दै संक्रमितको मृत्यु भएको अस्पतालले जनाएको छ।  

बस्नेतका अनुसार भदौ ८ गते कोरोना पुष्टि भएपछि उनलाई झापाकै मेची अस्पतालमा उपचारका लागि भर्ना गरिएको थियो । 

शरीर कमजोर हुने, ज्वरो आउनेलगायत कोरोनासँग मिल्ने लक्षण देखिएपछि पिसिआर परीक्षण गराउँदा पुरुषको रिपोर्ट पोजेटिभ आएको उनको भनाइ छ । 

झापामा उपचार भइरहँदा अवस्था थप गम्भीर बन्दै गएपछि शनिबार राति थप उपचारका लागि विराटनगर ल्याइएको बस्नेतले बताए।  तर उपचारका लागि आइसोलेसनतर्फ लैजान उनलाई  एम्बुलेन्सबाट झार्दाझार्दै संक्रमितको मृत्यु भएको चिकित्सकलाई उधृत गर्दै बस्नेतले बताए।  

उपचारका लागि ल्याउन ढिला भएका कारण संक्रमित पुरुषलाई बचाउन नसकिएको अस्पतालले जनाएको छ। शवको व्यवस्थापन नियम अनुसार हुने अस्पतालले जनाएको छ।