नेपालगञ्जमा संकलन भयो लक्ष्यभन्दा बढी राजश्व 

नेपालगञ्ज– नेपालगञ्ज भन्सार कार्यालयले चालु आर्थिक वर्षको दुई महिनामा उत्साहजनक राजश्व संकलन गर्न सफल भएको छ । 

कोरोना भाइरस महामारी संक्रमण रोकथामका लागि जारी बन्दाबन्दीका कारण गत आर्थिक वर्षमा राजश्व घाटा व्यहोरेको नेपालगञ्ज भन्सार कार्यालयलले चालु आवको साउन र भदौ महिनामा भने लक्ष्यभन्दा बढी राजश्व संकलन गरेको हो। 

चालु आवको पहिलो महिनामा नेपालगञ्ज भन्सार कार्यालयले एक अर्ब ६८ करोड राजश्व संकलन गरेको प्रमुख भन्सार अधिकृत शान्तिराम निरौलाले जानकारी दिए। 

उनका अनुसार साउन महिनामा ९४ करोड ७५ लाख छ हजार राजश्व उठाउने लक्ष्य लिइएकोमा लक्ष्यभन्दा ७३ करोड २५ लाख अर्थात् ५६ प्रतिशतभन्दा बढी राजश्व संकलन भएको छ । 

भदौ महिनामा राजश्व संकलन लक्ष्य एक अर्ब छ करोड रहेकामा लक्ष्यभन्दा अधिक एक अर्ब ४६ करोड संकलन भएको छ ।

बन्दाबन्दीका कारण अवैधरूपमा सामान भित्रिने कार्य बन्द भई सबैजसो सामग्री भन्सार हुँदै आएकोले राजश्व संकलनमा वृद्धि भएको प्रमुख भन्सार अधिकृत निरौलाको भनाइ छ। 

कोरोना महामारीका कारण नेपाल–भारत जमुनाह सीमा नाका बन्द रहे पनि नेपालगञ्ज भन्सार कार्यालयले दैनिकरूपमा आफ्नो गतिविधि सञ्चालन गर्दै आएको जानकारी दिए। उनले भने, ‘पछिल्लो समय उद्योग तथा कलकारखाना सञ्चालनमा आएपछि कच्चा पदार्थ ल्याउने क्रम ह्वात्तै बढेकाले उत्साहजनकरूपमा राजश्व संकलन भएको हो।’

नेपालगञ्ज भन्सार हुँदै औद्योगिक कच्चा पदार्थका साथै खाद्यान्न, औषधि तथा अत्यावश्यक सामग्री भित्रिने गरेका छन्। अहिले नेपालगञ्ज नाकाबाट फलफूल तथा तरकारीजन्य पदार्थ र मानिसको आवागमनमा भने पूर्णरूपमा रोक लगाइएको निरौलाले जानकारी दिए।

नेपालगञ्ज भन्सार कार्यालयबाट गत आव २०७६÷७७ मा साढे तीन अर्ब राजश्व घाटा भएको थियो । १५ अर्ब ४३ करोड ७५ लाख लक्ष्य रहेकामा ११ अर्ब ७७ करोड आठ लाख मात्र राजश्व संकलन हुँदा तीन अर्ब ६६ लाख राजश्व घाटा भएको हो।