श्राद्धमा खाना खाएका एकको मृत्यु, १८ जना बिरामी

धनगढी- कैलालीको गोदावरी नगरपालिका–१०, खमौराका १९ जना एकै दिन बिरामी परेका छन्।

बिरामीमध्ये एक जनाको मंगलबार बेलुका मृत्यु भएको कैलालीका प्रहरी नायब उपरीक्षक प्रतीक विष्टले बताए।

स्थानीय भीम बिष्टको घरमा श्राद्धमा खाना खाएर बिरामी परेका सोही स्थानका सुरेश बोहराको सेती प्रादेशिक अस्पतालमा उपचारका क्रममा मृत्यु भएको हो।

सेती प्रादेशिक अस्पतालका आकस्मिक वार्ड प्रमुख कृष्ण बोहराले मृतकमा फुड प्वाइजनिङ देखिएको बताए। उनका अनुसार बिरामीमा पनि सोही समस्या देखिएको छ।

गोदावरी नगरपालिका–१० का अध्यक्ष रवीन्द्र शाहीले १८ जनाको उपचार भइरहेको बताए। उनका अनुसार तीन जनाको नव जीवन अस्पताल, दुई जनाको माया मेट्रो अस्पताल र ११ जनाको सेती प्रादेशिक अस्पताल, दुई जनाको अत्तरियास्थित पद्मा अस्पताल र ग्वाँसी मेडिकलमा उपचार भइरहेको छ।

भदौ २७ गते श्राद्धमा खाना खाएपछि उनीहरु बिरामी परेका थिए।