बागलुङ बाढी अपडेट : १० जनाको शव भेटियो, अझै दर्जन बढी बेपत्ता

काठमाडौं- बागलुङको ढोरपाटन नगरपालिकास्थित सुकुर्दुङ बेखोलामा आएको बाढी र पहिरोमा बेपत्ता भएका मध्ये १० जनाको शव भेटिएको छ।

जिल्ला प्रहरी कार्यालय बागलुङका प्रहरी प्रवक्ता डिएसपी राजेन्द्र रेग्मीले अहिलेसम्म १० जनाको शव भेटिएको जानकारी दिए । ‘२ वटा थप शव पनि खोला किनार छ भन्ने जानकारी आएको छ,’ उनले भने,‘त्यहाँ टोली पुग्दैछ।’

उनले अझै कति बेपत्ता छन् भन्ने यकिन तथ्यांक नआइसकेको बताए। उद्धारको काम जारी रहेकाले कतिजना मानिसहरु बेपत्ता भएका हुन भन्ने यकिन हुन सकेको छैन।

जिल्ला प्रहरी कार्यालय बागलुङका अनुसार बाढीले १३ घर बगाएको छ। बाढी पीडित परिवारका सदस्यले दिएको जानकारी अनुसार बेपत्ताको संख्या बढ्न सक्ने देखिएको छ। तर, अहिलेसम्म यकिन भने हुन सकेको छैन।

अविरल वर्षासँगै गएराति १२ बजे आएको बाढीले बोबाङ, सुर्कुदुङ र शेरावाङ गाउँका घर बगाएको हो । उक्त बाढीमा परेर अझै एक दर्जन बढी वेपत्ता भएका छन् ।
राति नै घटनास्थलमा प्रहरी परिचालन गरिएको भन्दै बिहान नेपाली सेना र सशस्त्र प्रहरी बललाई घटनास्थलमा पठाइएको बागलुङका प्रमुख जिल्ला अधिकारी सुरेश न्यौपानेले बताए ।