काठमाडौं उपत्यकामा थप ७ दिन निषेध आदेश थप्ने तयारी

काठमाडौं- काठमाडौं उपत्यकामा थप एक साता निषेध आदेश थप्ने तयारी भएको छ ।

कोरोनाको संक्रमण झनै बढेको निष्कर्षसहित काठमाडौं, ललितपुर र भक्तपुरका प्रमुख जिल्ला अधिकारीले सात दिन निषेध आदेश थप्ने तयारी गरेका हुन् ।

मंगलबार तीन जिल्लाका सिडियोबीच भर्चुअल बैठक भएको थियो । बैठकमा जनस्वास्थ्य विद्, स्थानीय जनप्रतिनिधि र ब्यापारी व्यवसायीहरुले दिएको सुझावका विषयमा छलफल भएको थियो । छलफलमा थप सात दिन निषेध आदेश थप्ने सहमति भएको स्रोतले बताएको छ ।

उक्त सहमतिका विषयमा आज गृह मन्त्रालयलसँग थप छलफल गरेर निर्णय गर्ने तयारी भएको भक्तपुरकी प्रमुख जिल्ला अधिकारी हुमकला पाण्डेले जानकारी दिइन् ।

उद्योग तथा व्यापार व्यवसायीले निषेध आदेश खुकुलो पार्नुपर्ने माग गरेका छन्। स्थानीय जनप्रतिनिधि तथा नगरप्रमुख, स्वास्थ्यकर्मी र सुरक्षाकर्मीले भने निषेध आदेश कडा गर्नुपर्ने सुझाव दिएका छन्।

भदौ ३ गतेबाट सुरु भएको निषेध आदेश दोस्रो पटक थप गर्दै भदौ १७ गतेसम्म पुर्याइएको थियो । आज पुनः ७ दिन थप भए निषेध आदेश २१ दिन लामो हुनेछ ।