कोरोनाबाट एकै रातमा ५ जनाको मृत्यु, ललितपुरमा मात्रै २ जनाको ज्यान गयो

काठमाडौं- नेपालमा कोरोना भाइरसको संक्रमणबाट एकै रातमा पाँच जनाको मृत्यु भएको छ ।

मंगलबार राति सप्तरीमा एक, बुटबलमा दुई र ललितपुरमा २ जनाको मृत्यु भएको हो । जसमध्ये दुई जनामा मृत्युपछि मात्रै कोरोना संक्रमण पुष्टि भएको छ ।

सप्तरीको डाक्नेश्वरी नगरपालिका वडा नम्बर ८ घर भई राजविराज ६ स्थित सिरहा रोड बस्दै आएका ८० वर्षीय बृद्धाको मंगलबार राति मृत्यु भएको छ ।

चार दिनअघि ज्वरो आएपछि गरिएको स्वाब परीक्षणको रिपोर्ट मंगलबार आएको थियो । कोरोना पोजिटिभ देखिएपछि उनलाई आइसोलेसनमा ल्याउन एम्बुलेन्स पुगेको थियो । एम्बुलेन्समा ल्याउने क्रममा बाटोमै मृत्यु भएको जिल्ला स्वास्थ्य कार्यालय सप्तरीले जनाएको छ ।

यस्तै कोरोनाबाट कपिलवस्तुका दुई जना पुरुषको बुटवलमा मृत्यु भएको छ ।

बुटवल धागो कारखाना स्थित कोरोना विशेष उपचार केन्द्रमा उपचारको क्रममा कपिलवस्तुका २५ र ४२ वर्षिय पुरुषको मंगलबार राती मृत्यु भएको लुम्बिनी प्रादेशिक अस्पतालका प्रवक्ता डा विष्णु गौतमले जानकारी दिए।

कपिलवस्तुका ४२ वर्षिय पुरुषमा साउन २५ गते अस्पताल अस्पताल भएकै दिन कोरोना पुष्टि भएको थियो । २५ वर्षिय युवाको भने मृत्युपछि मात्रै रिपोर्ट आएको हो ।

त्यस्तै ललितपुरको पाटन अस्पताल र किस्ट अस्पतालमा उपचारका क्रममा दुई जना महिलाको मृत्यु भएको छ ।

काेराेना संक्रमित जनकपुरकी ३८ वर्षिया महिलाको उपचारका क्रममा मंगलबार राति पाटन अस्पतालमा मृत्यु भएको हो । अस्पतालका निर्देशक डा बिष्णुप्रसाद शर्माका अनुसार उनी साउन १८ गते मेनेन्जाइटिसको समस्या देखिएपछि अस्पताल भर्ना भएकी थिइन् ।

यस्तै काठमाडौंको टेकु घर भएकी एक महिलाको पनि कोरोनाबाट मृत्यु भएको छ ।

ललितपुरको ग्वार्कोस्थित किस्ट मेडिकल कलेजमा उपचारका क्रममा ७६ वर्षीया बृद्ध महिलाको मंगलबार राति मृत्यु भएको अस्पतालले जनाएको छ । उनको कोरोना परिक्षणको रिपोर्ट भने आज (बुधबार) बिहान मात्रै आएको हो ।

मंगलबार राति ज्यान गुमाएका पाँच जनासहित कोरोनाबाट ज्यान गुमाउनेको संख्या ८८ पुगेको छ । स्वास्थ्य मन्त्रालको नियमित पत्रकार सम्ममेलनका क्रममा मंगलबार दिउँसोसम्म ८३ जनाको कोरोनाबाट मृत्यु भएको थियो ।