'भ्रातृसंस्थाको म्याद थपेर देउवाले लोकतन्त्रको धज्जी उडाए'

काठमाडौं- नेपाली कांग्रेसका वरिष्ठ नेता रामचन्द्र पौडेलले पार्टीको महाधिवेशन प्रक्रिया सुरु भइसकेको अवस्थामा भ्रातृ संगठनको म्याद थपेर आन्तरिक लोकतन्त्रको धज्जी उडाउने काम भएको टिप्पणी गरेका छन्।

सभापति शेरबहादुर देउवाले शुक्रबार पार्टीका नौवटा संगठनको म्याद थपेपछि पौडेलको यस्तो प्रतिक्रिया आएको हो।

उनले सामाजिक सञ्जाल फेसबुकमा लेखेका छन्, 'म्याद थप्न पार्टीको बैठक सम्म राख्न आवश्यक नठानी केवल निर्देशानुसार भन्दै नौनौ वटा भ्रातृसंस्थाको म्याद थप्ने विज्ञप्ति जारी गराउने जस्तो निर्लज्ज कार्यले पार्टीको संगठन र यसको आन्तरिक लोकतन्त्रलाई धज्जी उडाइँदै छ।'

पौडेलले यसअघि निहित स्वार्थका लागि पटकपटक अधिवेशन स्थगित गराउँदै ल्याएर सारा भातृ संस्थाहरुको अस्थिपन्जर मात्र बाँकी राख्ने काम भएको आरोप लगाएका छन्।

उनले लोकतन्त्रका लागि आफ्नो जीवन अर्पेर हिंडेका व्यक्तित्वहरुलाई गम्भीर हुन आग्रह गरेका छन्।

याे पनि पढ्नुस् ः

कांग्रेसले भ्रातृ संघहरुको म्याद थप्यो