कालीमाटी वृत्तका दुई प्रहरीमा कोराना संक्रमण, कार्यालय नै सिल

काठमाडौं- महानगरीय प्रहरी वृत्त कालीमाटीमा कार्यरत दुई प्रहरीमा कोरोनाको संक्रमण पुष्टि भएको छ।

र्‍यापिड टेस्टमा पोजेटिभ पाइएपछि गरिएको पीसीआर टेस्टले उनीहरूमा संक्रमण भएको पुष्टि भएको महानगरीय प्रहरी परिसरका प्रमुख एसएसपी श्याम ज्ञवालीले जानकारी दिए।

दुई प्रहरी कसरी संक्रमित भए भन्ने विषयमा खुल्न नसकेको उनले बताए।  उनीहरु कहाँकहाँ गएका थिए, कसरी सर्यो भन्ने विषयमा कन्ट्याक्ट ट्रेसिङ थालिएको छ।

संक्रमित बस्ने व्यारेकमा दुई सय १४ जना प्रहरी बस्दै आएका छन्। उनीहरुमा संक्रमण देखिएपछि कालीमाटी वृत्तका प्रहरी त्रसित बनेका छन्।

महानगरीय प्रहरी वृत्त कालीमाटीको महिला सेल र ट्राफिक प्रहरी प्रभाग सिल गरिएको छ। थप कदम के थाल्ने भन्ने विषयमा छलफल भइराखेको एसएसपी ज्ञवालीले बताए ।

मंगलबार मात्रै सुनसरीमा एक जना सशस्त्र प्रहरी र धनकुटामा एक जना प्रहरीमा संक्रमण देखिएको थियो।