एक युवामा कोरोना देखिएपछि इटहरीका दुई वडा सिल

इटहरी - इटहरी २ को सुन्दर टोलमा बस्ने एक १८ वर्षीय युवामा कोभिड-१९ संक्रमण भेटिएपछि दुई वडा सिल गरिएको छ। स्थानीय प्रशासनसँगको समन्वयमा वडा नम्बर २ र ३ सिल गरिएको वडा नम्बर २ का अध्यक्ष हर्क मगरले जानकारी दिए। इटहरी उपमहानगरपालिकाले एक सार्वजनिक सूचना जारी गर्दै ११ गते सम्म दुवै वडा सिल गरेको जानकारी दिएको छ।

मगरका अनुसार कोभिड-१९ संक्रमण भएका युवा २० दिनदेखि बिमारी भएको खुलेको छ। उनी धरानमा मृत्यु भएका एक आफन्तको मलामी गएर आएपछि बिरामी परेको जानकारी आएको मगरले बताए। खोटाङबाट ६ महिना अघि तराई आएका संक्रमित युवा इटहरीमा रहेर बेलायती सेनाको भर्तिको तयारीको अभ्यास गर्दै बसेका थिए।

विपी कोइराला स्वास्थ्य विज्ञान प्रतिष्ठानको जाँचमा कोरोना संक्रमण पुष्टि भएका उनी बिरामी हुँदा इटहरीका धामी र स्वास्थ्य क्लिनिकमा समेत पुगेको जानकारी आएको अध्यक्ष मगरले बताए। अब बिरामीको कन्ट्याक्क ट्रेसिङसँग जोडिएका सबैको जाँच गर्ने प्रदेश १ सरकारले बताएको छ। मुख्यमन्त्रीका प्रमुख स्वकीय सचिव नवराज राईले आजैबाट काम थालिएको बताए।