धादिङको थाक्रे गाउँपालिकाको जुँगेखोला बस्ती सिल

काठमाडौं- एक जनामा कोरोना भाइरस संक्रमण पुष्टि भएपछि धादिङको थाक्रे गाउँपालिका–७ जुँगेखोलास्थित बस्ती सिल गरिएको छ।

संक्रमित ४१ वर्षीय पुरुष लकडाउनको समयमा ४७ दिन बसेको उक्त बस्ती मंगलबारबाट सिल गरिएको हो।

मंगलबार बसेको जिल्ला सुरक्षा समिति बैठकले पूर्वमा धार्केखोला पुल, पश्चिममा आठकिलो मोड, उत्तरमा महेश खोला र दक्षिणमा उडुवादेवी आधारभूत विद्यालयबीचको क्षेत्रलाई सिल गर्ने निर्णय गरेको प्रमुख जिल्ला अधिकारी अस्मान तामाङले जानकारी दिए।

सिल गरिएको उक्त चार किल्लाभित्र प्रहरी परिचालन गरेर पूर्ण रूपमा आवतजावत बन्द गराइएको तामाङले बताए।

गाउँपालिका अध्यक्ष रामकुमार आचार्यले संक्रमित लामो समय गाउँमा बसेर काठमाडौं आएकाले उनको सम्पर्कमा रहेकाहरूको पहिचान गर्न वडाअध्यक्ष रामकुमार बस्नेत, स्वास्थ्यकर्मी र सुरक्षाकर्मीसहितको टिम बनाइएको जानकारी दिए।

संक्रमित काम गर्ने काठमाडौं बागबजारको एक छापाखाना पनि सिल गरिएको छ।

लकडाउन भएकै दिन चैत ११ गते गाउँमा पुगेका संक्रमित वैशाख २८ गते मोटसाइकलमा काठमाडौं फर्किएको बुझिएको छ।