काेराेनाबाट पहिलाे मृतककाे गाउँबाट १९७ काे स्वाब संकलन

सिन्धुपाल्चोक- कोरोना भाइरस संक्रमणबाट मृत्यु भएकी महिलाको सम्पर्कमा रहेका व्यक्तिको पीसीआर परीक्षणका लागि १९७ जनाको स्वाब संकलन गरिएको छ।

बाह्रबिसे नगरपालिका वडा–९ राम्चे र बाह्रबिसे प्राथामिक स्वास्थ्य केन्द्रमबाट ‘थ्रोट स्वाब’ संकलन गरेर नमुना परीक्षणका लागि राष्ट्रिय जनस्वास्थ्य प्रयोगशालामा पठाइएको जिल्ला समन्वय समितिका संयोजक कृष्णगोपाल तामाङले जानकारी दिए। दुई दिन लगाएर स्वाब संकलन गरिएको हो।

काठमाडौंको त्रिवि शिक्षण अस्पतालमा सुत्केरी भएकी राम्चेकी एक महिला घर पुगेको केही दिनपछि बिरामी भएकी थिइन्।

सुरुमा स्थानीय बाह्रबिसेस्थित प्राथमिक स्वास्थ्य केन्द्रमा उपचार गराई उनलाई थप उपचारका लागि धुलिखेल लगिएको थियो। उपचारकै क्रममा उनको बिहीबार निधन भएको थियो।

निधनपछि स्वाब संकलन गरी परीक्षण गर्दा उनको कोरोना भाइरस संक्रमण पुष्टि भएको थियो। त्यसपछि राम्चे, उनको माइतीगाउँ बलेफी र प्राथमिक स्वास्थ्य चौकीसहित ती महिलाको सम्पर्कमा आएका व्यक्तिहरुको स्वाब संकलन गरिएको संयोजक तामाङले बताए।  महिलाबाट जन्मिएका शिशुको भने कोरोना भाइरस नेगेटिभ रिपोर्ट आइसकेको छ।