भ्रमण वर्षलाई सघाउन मेची–महाकाली पैदल यात्रा

काठमाडौं– सरकारले घोषणा गरेको महत्वाकांक्षी अभियान नेपाल भ्रमण वर्ष २०२० लाई सघाउन भन्दै झापाका दुई युवा मेची–महाकाली यात्रामा निस्केका छन्। गएको मंसिर २० गते महाकालीको गड्डाचौकीबाट यात्रा सुरु गरेका सुरेश उप्रेती र खगेन्द्र निरौलाले झापाको काँकडभिट्टा पुगेर आफ्नो यात्रा पूरा गर्नेछन्।

सुरेशले नेपाल समयसँग भने, ‘मुलुकको आर्थिक विकासको आधार पर्यटन नै हो । नेपालको पूर्वदेखि पश्चिमसम्म बस्ने हरेक नेपालीले आ–आफ्ना स्थानका सामाजिक तथा सांस्कृतिक धरोहरहरूको संरक्षण एवम् संवर्द्धन गरी हाम्रो राष्ट्रिय पहिचानलाई जगेर्ना गर्नुपर्छ। त्यसकारण नै हामी यस यात्रामा निस्केका हौं।’

अर्का यात्री खगेन्द्रले भ्रमण वर्षलाई राष्ट्रिय उत्सवका रूपमा लिएर यसको प्रचारप्रसार युवापिँढीसम्म पुर्याएर रोजगारी सिर्जना गर्न सकिने बताए।
मेचीनगर–६ का सुरेश र दमकका खगेन्द्रले मेचीदेखि महाकालीसम्मको करिब १ हजार ३१ किलोमिटर पदयात्रा निजी खर्चमा नै गरिरहेको जनाएका छन्।

उप्रेतीले यसअघि दमकदेखि ताप्लेजुङको पाथिभरा मन्दिरसम्म ३ पटक पैदल यात्रा गरिसकेका छन् । उनले जम्मु–कस्मीरको अमनाथ यात्राको करिब ७५ किलोमिटर पैदल हिँडिसकेका छन्।