टाटा सुमो दुर्घटनाका मृतकको संख्या ५ पुग्यो, तीनजनाको सनाखत

काठमाडौं– मकवानपुरको इन्द्रसरोवरमा बिहीबार भएको टाटा सुमो दुर्घटनामा मृत्यु हुनेको संख्या ५ पुगेको छ। दुर्घटनामा ४ जना घाइते भएका छन्।

मृतकमध्ये दुई तीनजनाको मात्र सनाखत भएको प्रहरी निरीक्षक ललनप्रसाद कुर्मीले जानरी दिए। उनका अनुसार ज्यान गुमाउनेमा रौतहट चन्द्रनिगाहपुरका २१ वर्षीय महेश बिक, २० वर्षीया सृजना बिक र नेत्रबहादुर बिक छन्।अन्य मृतकको सनाखत हुन नसकेको कुर्मीले जानकारी दिए। दुर्घटनामा तीन जनाको घटनास्थलमा र अन्य दुईको उपचारका लागि अस्पताल लग्दै गर्दा बाटोमा ज्यान गएको प्रहरीले जनाएको छ।

घाईते मध्ये दुई जनाको बल्खुस्थ्ति बयोदा अस्पताल र दुई जनाको ललितपुरसिथ्त मेडिसिटी अस्पतालमा उपचार भैरहेको प्रहरीले जनाएको छ। प्रहरीका अनुसार जीप सडकबाट करिव दुई सय मिटर तल खसेको छ। दुर्घटनाको कारण खुल्न सकेको छैन।

ना १ ज ३४३३ नम्बरको उक्त टाटा सुमो चन्द्रनिगाहपुरबाट काठमाडौतर्फ आउँदै गरेको बुझिएको छ। दुर्घटना इन्द्रसरोवर गाउँपालिका–३ ओखलडाँडामा भएको हो।