मनकारी वडासदस्य, जसले वर्षभरको सुविधा भत्ताबाट विपन्नलाई कम्बल दिए

धनगढी– जनअपेक्षा अनुसार काम नगरेको भन्दै जनप्रतिनिधि आलोचित भइरहेका बेला कैलालीको गौरीगंगा नगरपालिका–६, वनबेहडाका एक वडा सदस्यले भने वर्षभरको सुविधा भत्ताको रकमबाट अति विपन्न परिवारलाई कम्बल वितरण गरेका छन्।

गौरीगंगा नगरपालिका–६, वनबेहडाका वडा सदस्य टेकबहादुर कुँवरले वडाका विपन्न परिवारका ६० जनालाई दुई लाख रूपैयाँ बराबरको कम्बल वितरण गरेका हुन्।

उनीहरूलाई बुधबार आयोजित एक समारोहमा कम्बल वितरण गरियो।

वडा सदस्य कुँवरले सामाजिक दायित्वअन्तर्गत विपन्न परिवारलाई कम्बल वितरण गरेको बताए। सुविधा भत्ताको रकममा केही थपेर कम्बल किनेको उनको भनाइ छ। 

समारोहमा नेपाली कांग्रेसका सभापति नरनारायण शाह ‘मनु’ले कुँवरको कामको प्रशंसा गरे। “यसले जनप्रतिनिधिप्रति जनताको विश्वास बढाएको छ,” उनले भने।

सो अवसरमा १० ज्येष्ठ नागरिकलाई सम्मान गरिएको छ।

कुँवर नेपाली कांग्रेसबाट निर्वाचित भएका हुन्।