कैलाली र कञ्‍चनपुरको जनजीवन चिसोले कष्टकर, हवाई उडान पनि प्रभावित

धनगढी । सुदूरपश्चिम तराईमा केही दिनदेखि बढेको चिसोका कारण जनजीवन प्रभावित बन्दै गएको छ । पुस १ गतेदेखि कैलालीमा राम्रोसँग घाम लाग्न सकेको छैन । कैलाली र कञ्चनपुरमा चिसोका कारण स्थानीय आफ्नो दैनिकी समेत चलाउन समस्यामा परेका छन् । विशेषगरी बच्चा र वृद्धवृद्धा बढी मारमा परेका छन् ।

पश्चिमी वायुको प्रभावले देशभर चिसो बढ्ने क्रम सुरू भएकोमा धनगढीमा पनि बढी चिसो महसुस गरिएको जल तथा मौसम पूर्वानुमान महाशाखाले जनाएको छ । चिसो अझै बढ्ने क्रममा रहेको मौसम पूर्वानुमान महाशाखा फिल्ड कार्यालय अत्तरियाले जानकारी दिएको छ । अबको केही दिन तापक्रम घटबढ भइरहने छ ।

चिसो बढ्न थालेपछि बालबालिका, जेष्ठ नागरिक तथा मजदुरी गर्ने व्यक्तिलाई बढी समस्या भएको धनगढी उपमहानगरपालिका वडा नम्बर १ मुक्त कमैया शिविरका चुल्लुराम चौधरीले बताए । आर्थिक अवस्था कमजोर हुँदा शिविरमा बस्नेहरुले न्यानो लुगा समेत किन्न नपाएको उनको गुनासो छ ।

चिसो बढ्दै गएपनि धनगढी उपमहानगरपालिकाले दाउरा वितरण नगरेको नगरवासीले गुनासो गरेका छन् । विगतका वर्षमा उपमहानगरपालिकाले दाउरा वितरण गर्ने गरेको थियो ।

चिसोका कारण स्वास्थ्य संस्थामा बिरामी पनि बढेका छन् । चिसोबाट बच्न न्यानो कपडा लगाउनुका साथै झोलिलो पदार्थ खान चिकित्सकले सुझाव दिएका छन् ।

धनगढी उपमहानगरपालिका मेयर नृपबहादुर वडले चिसोलाई मध्यनजर गर्दै वृद्धवृद्धालाई न्यानो कपडा र धनगढी बजारमा दाउरा वितरण गरिने बताए । अत्यधिक चिसो बढेपछि धनगढी उपमहानगरपालिका र भिमदत्त नगरपालिकाले आफ्नो क्षेत्रका विद्यालय केही दिन बन्द गर्ने निर्णय गरेका छन् ।

हवाई उडान प्रभावित

खराब मौसमका कारण धनगढी विमानस्थलबाट हुने हवाई उडान समेत प्रभावित भएका छन् । मौसममा आएको परिवर्तनसँगै भिजिविलिटी पर्याप्त नहुँदा उडान प्रभावित भएको विमानस्थल कार्यालयले जनाएको छ ।

धनगढी विमानस्थलका प्रमुख तेजबहादुर बुढथापाले प्रतिकूल मौसमका कारण मंगलबार साँझ काठमाडौंबाट धनगढीका लागि हुने श्री एयरलाईन्सको उडान नभएको जानकारी दिए । बुद्ध एयरले भने निर्धारित समय भन्दा ढिलोगरी उडान भरिरहेको जनाएको छ ।