मुग्‍लिन–नारायणगढ सडकको पहिरो रोक्न अझै दुई साता लाग्ने

काठमाडौं– मुग्लिन–नारायणगढ सडक खण्डमा पहिरो रोक्ने काम भइरहेको छ। बिहान १० बजेदेखि दिउँसो ३ बजेसम्म सवारी आवागमन बन्द गरेर काम भइरहेको छ ।

नारायणगढबाट मुग्लिनतर्फ जाने सवारी साधनमध्ये यात्रुवाहक मिनिबस, माइक्रो बस, साना सवारीसाधनलाई पन्ध्रकिलो बजारमा रोकिएको छ भने मालवाहक मालवाहक सवारी ट्रक, लरी, टेलर, टिप्पर र ट्याङ्करलार्ई दासढुङ्गामा रोकएको छ ।

त्यस्तै नारायणगढ तर्फ जाने सवारीलाई लेवाटार तथा आवुखैरहनीमा रोकिएको छ । मुग्लिन नारायणगढ प्रवेश नगर्ने सवारीलाई भने रोकिएको छैन । दिउँसोको समयमा सडक बन्द गरेर अहिले आठ स्थानमा रकनेटिङ, बोल्टिङ र बायो इञ्जिनियरिङ प्रविधिबाट पहिरो रोकथामको काम भइरहेको मुग्लिन–नारायणगढ सडकखण्ड आयोजनाका इन्जिनियर तथा सूचना अधिकारी शिव खनालले बताए ।

जिल्ला प्रशासन कार्यालय चितवनले नारायणगढ–मुग्लिन सडक आयोजनको माग अनुसार मंसिर २७ गतेदेखि दुई हप्ताको लागि सो सडकमा दिउँसोको समयमा सवारी आवागमन बन्द गर्न निर्देशन दिएको थियो । म्याद सकिन अब २ दिनमात्रै बाँकी रहँदा काम पूर्ण रुपमा नसकिएको भन्दै दुई हप्ताको समय थप गर्ने विषयमा छलफल भइरहेको खनालले बताए ।

गाईघाटदेखि कालिखोलासम्म पहिरो सम्भावित ८ ठाउँमा पहिरो रोकथामको कार्य भइरहेको छ । हालसम्म ६ स्थानको काम सकिएको र २ ठाउँमा बाँकी रहेकोले समय थप गर्नुपर्ने खनाल बताउँछन् । सडक खण्डमा माथि अड्किएका ढुङ्गा झार्ने काम भइरहेको छ । नारायणगढ–मुग्लिन सडक खण्डमा पहिरोग्रस्त क्षेत्र भनेर ३२ ठाउँ तोकिएको छ । त्यसमध्ये २४ स्थानमा पहिरो रोकथामको काम भइसकेको छ ।