एसईईको प्रश्नपत्र केन्द्रबाटै छापिने, प्रदेशका शिक्षा निर्देशक असन्तुष्ट

काठमाडौ- प्रवेशिका परीक्षा (एसईई) को प्रश्नपत्र यसपटक पनि केन्द्रबाटै छापिने भएको छ। माध्यमिक तहको शिक्षाको अधिकार प्रदेश तहलाई प्रत्यायोजित गरेपनि प्रश्नपत्र केन्द्रले नै छाप्दै आएको छ।

संविधानअनुसार कक्षा ८ सम्मको परीक्षा पूर्ण रूपमा स्थानीय तहले सञ्चालन गर्ने छ भने माध्यमिक तहको परीक्षा प्रदेश सरकारले सञ्चालन र व्यवस्थान गर्ने भनिएको छ।

तर, एसईई परिक्षामा केन्द्रले नै हस्तक्षेप गर्दै आएको छ । गत वर्ष अर्को वर्षदेखि प्रदेशले नै एसईई सञ्चालन गर्ने घोषणा गर्दै बजेट समेत दिइएको थियो।

यस वर्ष प्रदेश ५ ला एसईई परिक्षाको उत्तरपुस्तिका छाप्न भनेर तीन करोड १२ लाख रुपैयाँ उपलब्ध गराइएको थियो । प्रदेश ३ लाई पाँच करोड ३९ लाख रुपैयाँ उपलब्ध गराइएको छ।

तर, सरकारले बजेट नै छुट्याए पनि केन्द्र सरकार आफैले प्रश्नपत्र छापेको भन्दै शिक्षा निर्देशकहरुले असन्तुष्टि जनाएका छन् । यो वर्षबाट प्रदेशलाई नै प्रश्नपत्र छाप्न र परिक्षा संचालन गर्ने अधिकार दिने भनिएपनि केन्द्रले आफूखुसी गरेको भन्दै प्रदेशका शिक्षा निर्देशकहरुले असन्तुष्टि जनाएका हुन् ।

प्रदेश ५ का शिक्षा निर्देशक मनोज गैरेले केन्द्रले प्रदेशमाथि विश्वास नगरेको भन्दै गुनासो गरे । प्रदेश ३ का शिक्षा निर्देशक चन्द्र लुइँटेलले एसईई परीक्षा व्यवस्थापनको जिम्मा लिन आफूहरू तयार भएपनि केन्द्रले नपत्याएको भन्दै असन्तुष्टि जनाए ।

हाल केन्द्रले जनक शिक्षा सामग्री केन्द्रमा तीनवटै सुरक्षा निकायलाई प्रयोग गरेर प्रश्नपत्र छाप्दै आएको छ। परीक्षा नियन्त्रण कार्यालयले ६१ विषयका प्रश्नपत्र छाप्ने गरेको छ भने अनिवार्य विषयका प्रश्नपत्र फरकफरक प्रदेशका लागि फरकफरक बनाउने गरेको छ।