सीमा समस्या सुल्झाउन सरकारलाई निर्देशन, केन्द्रीय समिति बैठक पुस अन्तिम साता

काठमाडौं– सत्तारुढ दल नेपाल कम्युनिष्ट पार्टी (नेकपा)ले नेपाल र भारतबीच देखिएको सीमा समस्या तत्काल समाधान गर्न सरकारलाई निर्देशन दिएको छ। मंसिर २९ मा सुरु भएको स्थायी कमिटी बैठकले अन्तिम दिन आइतबार यस्तो निर्देशन दिने निर्णय गरेको हो।

स्थायी कमिटी बैठकले यही पुस २३ गते केन्द्रीय कमिटीको बैठक बोलाउने निर्णय पनि गरेको छ। साथै विधान संशोधनको प्रस्ताव तयार पारेर केन्द्रीय कमिटी बैठकमा पेस गर्ने र पछिल्लो समय भएका सडक दुर्घटनाका घाइतेलाई उचित क्षतिपूर्तिसहित राहतको व्यवस्था गर्न सरकारलाई निर्देशन दिने निर्णय पनि बैठकले गरेको छ।

बैठकले अध्यक्ष पुष्पकमल दाहाल प्रचण्डले प्रस्तुत गरेको राजनीतिक प्रतिवेदन सुझावसहित पारित गरेको छ।

बहुचर्चित एमसीसी प्रकरणबारे भने बैठकले कुनै निर्णय गर्न सकेन । एमसीसीबारे सचिवालयलाई आवश्यक गृहकार्य गरेर निर्णय लिन सक्ने अख्तियारी स्थायी कमिटीले दिएको छ।

स्थायी कमिटी बैठकले पार्टीका नेता वामदेव गौतमलाई उपाध्यक्ष बनाउने सचिवालयको प्रस्ताव पनि पारित गरेको छ। अब यो निर्णयलाई केन्द्रीय समिति बैठकमा प्रस्तुत गरिनेछ । केन्द्रीय कमिटीले प्रस्ताव पारित गरेपछि गौतम औपचारिक रुपमा नेकपाको उपाध्यक्ष बन्नेछन्।

विधान संशोधन भएपछि मात्र गौतम नेकपाको उपाध्यक्ष हुन पाउनेछन्। नेकपामा विधान संशोनको अधिकार केन्द्रीय कमिटीलाई मात्र छ।
गौतम तत्कालीन नेकपामा एमालेमा पनि उपाध्यक्ष थिए।