नबुझ्नेले मात्र एमसीसीको विरोध गरेका हुन्ः डा. महत

काठमाडौं– प्रमुख प्रतिपक्षी दल नेपाली कांग्रेसका केन्द्रीय सदस्य तथा पूर्व अर्थमन्त्री डा. रामशरण महतले एमसीसी अमेरिकाको सैन्य गठबन्धनको अंग नभएकोले नेपालले संसदबाट चाँडोभन्दा चाँडो पारित गर्नुपर्ने बताएका छन् । आइतबार एक कार्यक्रममा उनले एमसीसीबारे भ्रममा नपर्न पनि आग्रह गरे ।

‘यो कुनै पनि मुलुकको खिलाफमा छैन । मुलुकको आर्थिक वृद्धिदर बढाउनको लागि एमसीसी अन्तर्गतका कार्यक्रमहरुले ठूलो मद्दत पुग्छ,’ उनले भने, ‘जसले यसको विरोध गरिरहेका छन्, त्यो भनेको अज्ञानताको कारण हो । एमसीसी भनेको त स्वतन्त्र बडी हो । यसमा कहाँ छ सैन्य गठबन्धन ? यो अमेरिकाको सैन्य गठबन्धन हो भन्नु काल्पनिक कुरा हो ।’

महतले सन् २००४ मा अमेरिकाको संसदले कानुन बनाएर एमसीसी पास गरेको स्पष्ट पारे । उनले भने, ‘यो अमेरिकाको विदेश मन्त्रालयको पनि अंग होइन । सन् २००२ मा मेक्सिकोमा भएको सम्मेलनमा नेपालको तर्फबाट मेरै नेतृत्वमा प्रतिनिधिमण्डल सहभागी थियो । गरिब मुलुकहरुको उत्थानको लागि, गरिबी निवारणको लागि यो कार्यक्रमको घोषणा भइको हो ।’