बालुवाटार जग्गा काण्डमा अख्तियारकै पूर्वप्रमुख संलग्‍न, भ्रष्टाचारको मुद्दा चलाइने !

काठमाडौं- राजधानीबाट प्रकाशित आइतबारका राष्ट्रिय दैनिक अखबारहरुले विविध विषयका खबरलाई प्राथमिकतामा पारेका छन् ।

कान्तिपुर दैनिकले अख्तियार दुरुपयोग अनुसन्धान आयोगको अनुसन्धान टोलीले बालुवाटारको सरकारी जग्गा अनियमिततामा आफ्नै पूर्वप्रमुख दीप बस्न्यातसहितको मिलेमतो रहेको भन्दै छानबिन प्रतिवेदन पेस गरेको विषयलाई मुख्य समाचार बनाएको छ ।

अनुसन्धान टोलीले बस्न्यातसहितका सरकारी कर्मचारी र अन्य भूमाफियालाई भ्रष्टाचार मुद्दा चलाउनुपर्ने रायसहित प्रतिवेदन बुझाएको हो । आयुक्तहरूले प्रतिवेदन अध्ययन गरिरहेको समाचारमा उल्लेख छ ।

आजको नयाँ पत्रिकाले यती समूहको अर्को बद्मासीको खुलासा गरेको छ । यतीले धरानमा विमानस्थल बनाउने भन्दै स्थानीयको जग्गा १६ वर्षदेखि कब्जा गरेको खुलासा गरेको हो ।

सगरमाथा राष्ट्रिय निकुञ्ज गैरकानुनी रूपमा कब्जा गरेको र गोकर्ण रिसोर्ट तथा दरबारमार्गको सरकारी जग्गा अनियमित रूपमा हत्याएको यती समूहले व्यक्तिका जग्गामा पनि कुदृष्टि राखेको समाचारमा उल्लेख छ ।

विमानस्थल बनाइदिन्छु भन्दै धरानका २५ परिवारबाट ९२ रोपनी जग्गा यतीले कौडीको भाउमा लिएको थियो, जब कि नेपालको कानुनअनुसार निजी कम्पनीले विमानस्थल बनाउन पाउँदैन ।

यस्तै अन्नपूर्ण पोस्ट् र नागरिक दैनिकले नेकपाको जारी स्थायी समिति बैठक छाडेर नेताहरु राष्ट्रपति विद्यादेवी भण्डारीलाई भेट्न गएको विषयलाई मुख्य समाचार बनाएका छन् ।

पार्टी र सरकारका काममा राष्ट्रपतिले हस्तक्षेप गरेको आरोप लागिराखेका बेला उनले बैठक चलिरहेकै बेला केहि प्रभावशाली नेताहरुलाई आफ्नो निवासमा बोलाएर छलफल गरेकी हुन् । राष्ट्रपतिको शैलीले नेकपाका अध्यक्ष पुष्पकमल दाहाल प्रचण्ड रुष्ट बनेका छन् ।

अमेरिकी नियोग मिलिनियम च्यालेन्ज कर्पोरेसन एमसीसीलाई कार्यान्व्यन गर्ने विषयमा सत्तारुढ नेकपा र सरकार विभाजित भएको विषयलाई कान्तिपुरले प्राथमिकताका साथ छापेको छ।

ललिता निवास प्रकरण : आफ्नै पूर्वप्रमुखविरुद्ध मुद्दा चलाउन सिफारिस

कान्तिपुरमा प्रकाशित समाचारअनुसार अख्तियार दुरुपयोग अनुसन्धान आयोगको अनुसन्धान टोलीले ‘ललिता निवास’ को जग्गा अनियमिततामा आफ्नै पूर्वप्रमुख दीप बस्न्यातसहितको मिलेमतो रहेको भन्दै छानबिन प्रतिवेदन पेस गरेको छ ।

अख्तियारकै एक महाशाखा प्रमुखको नेतृत्वमा बनेको अनुसन्धान टोलीले बस्न्यातसहितका सरकारी कर्मचारी र अन्य भूमाफियालाई भ्रष्टाचार मुद्दा चलाउनुपर्ने रायसहित प्रतिवेदन बुझाएको हो । आयुक्तहरूले प्रतिवेदन अध्ययन गरिरहेका छन् ।

‘टोलीले रायको मस्यौदासहित प्रतिवेदन बुझाइसकेको छ । त्यसको अध्ययनपछि आउने प्रतिक्रियाका आधारमा अख्तियार बोर्डमा प्रतिवेदन पेस भएपछि आवश्यक निर्णय होला,’ अख्तियार उच्च स्रोतले कान्तिपुरसित भन्यो, ‘बाहिर जानुभएका एक आयुक्त पनि फर्किसक्नुभएको छ । सम्भवतः यो साता निर्णय हुनेछ ।’

अति उच्च संवेदनशील विषय भएकाले निर्णय हुने दिन नै मुद्दा लैजाने गरी आरोपपत्रको मस्यौदा पनि तयार पारिँदै छ । आयुक्तहरूको सल्लाहअनुसार प्रतिवेदनमा केही विषयवस्तु सामान्य हेरफेर भने हुन सक्ने स्रोतले उल्लेख गर्‍यो ।

कान्तिपुरको सम्पर्कमा आएका अख्तियारका फरकफरक स्रोतले, तत्कालीन भौतिक योजना तथा निर्माण मन्त्रालयका सचिवसमेत रहेका दीप बस्न्यात र भूमिसुधार तथा व्यवस्था मन्त्रालयका सचिव छविराज पन्तविरुद्ध भ्रष्टाचार मुद्दा दायर गर्ने निश्चित भएको पुष्टि गरे । पूर्वसचिव पन्त २०६९ सालमा गठित खिलराज रेग्मी नेतृत्वको चुनावी सरकारमा मन्त्री पनि थिए ।

तत्कालीन उपप्रधानमन्त्री विजयकुमार गच्छदार, भूमिसुधारमन्त्री डम्बर श्रेष्ठलगायतसँग बयान लिए पनि उनीहरूमाथिको रायका बारे स्रोतले केही बताउन चाहेन । एक साताभित्रै विशेष अदालतमा मुद्दा लैजाने अख्तियारको तयारी छ ।

धरानमा विमानस्थल बनाउने भन्दै स्थानीयको जग्गा १६ वर्षदेखि यती एयरको पकडमा

नयाँ पत्रिकामा प्रकाशित समाचारअनुसार सगरमाथा राष्ट्रिय निकुञ्ज गैरकानुनी रूपमा कब्जा गरेको र गोकर्ण रिसोर्ट तथा दरबारमार्गको सरकारी जग्गा अनियमित रूपमा हत्याएको यती समूहले व्यक्तिका जग्गामा पनि कुदृष्टि राखेको छ ।

विमानस्थल बनाइदिन्छु भन्दै धरानका २५ परिवारबाट ९२ रोपनी जग्गा यतीले कौडीको भाउमा लिएको थियो, जब कि नेपालको कानुनअनुसार निजी कम्पनीले विमानस्थल बनाउन पाउँदैन ।

राजा ज्ञानेन्द्रले शासन हातमा लिएका वेला चैत ०६० मा विमानस्थल बनाउने भन्दै धरान घोपाडाँडाका स्थानीयबाट मुआब्जाको शैलीमा पैसा दिएर जग्गा जम्मा गरेको थियो । राजाबाट टीका लगाएर मेयर बनेका कुमारबहादुर कार्कीले मध्यस्थता गरेर स्थानीयको सात बिघा तीन कट्ठा पाँच धुर (करिब ९२ रोपनी) जग्गा यतीलाई दिलाएका थिए ।

मेयरसमेतले विमानस्थल बन्ने हो भनेपछि स्थानीयले २८ देखि ४० हजार प्रतिकट्ठाका दरले जग्गा दिएका थिए । अहिले सो क्षेत्रमा जग्गाको मूल्य प्रतिकट्ठा १५ देखि ३० लाखमा कारोबार भइरहेको वडा नम्बर १७ का वडाअध्यक्ष सूर्यकुमार भट्टराई बताउँछन् । तर, ९२ रोपनी जग्गा यतीले जम्मा ४५ लाख रुपैयाँभन्दा कम मूल्यमा हात पारेको थियो । अहिले स्थानीय बजारभाउअनुसार सो जग्गाको मूल्य ३२ करोडभन्दा बढी पर्छ ।

विमानस्थल नबनेमा स्थानीयले पैसा फिर्ता गर्ने र यतीले जग्गा फिर्ता गर्ने भनेर कागजमै स्पष्ट लेखिएको छ । १६ वर्षसम्म विमानस्थल नबनेपछि स्थानीयले जग्गा फिर्ता मागेका छन् ।

‘मेरो जग्गाको प्रतिकट्ठा २८ हजारका दरले मात्रै रकम पाएको हुँ । मलाई पैसा चाहिएर जग्गा दिएको पनि होइन, विकासका लागि जग्गा दिएका थियौँ,’ स्थानीय इन्द्र कटुवालले नयाँ पत्रिकासँग भने, ‘तर, विमानस्थल पनि निर्माण भएन, जग्गा फिर्ता पनि भएन । विमानस्थल नबने जग्गा फिर्ता गर्ने सहमतिपत्र छ । अब यसैलाई आधार मानेर हामी मुद्दामा जान छलफल गरिरहेका छौँ ।’

तर, यतीले भने अब २२ लाख प्रतिकट्ठाका दरले यो जग्गा सरकारलाई भिडाउन खोजेको छ । जनताबाट सस्तोमा किनेकोभन्दा ५७ गुणा बढीमा सरकारलाई बेच्न यतीले नागरिक उड्डयन प्राधिकरणलाई दबाब दिँदै आएको छ ।