ठगी गर्नेको साथबाट सरकारी छाप र कागजात बरामद

काठमाडौं - कन्सल्टेन्सीको नाममा ठगी गरेको आरोपमा पक्राउ परेका एक जनासँग सरकारी छापलगायत कागजात फेला परेका छन्।

ठगीको उजुरीका आधारमा पक्राउ परेका स्याङ्जा पुतलीबजार–२ का २७ वर्षीय रोहिन भनिने नेत्रबहादुर घर्तीको साथबाट प्रहरीले विभिन्न सरकारी कार्यालयका छाप, ३७ वटा नक्कली प्रहरी रिपोर्ट, १४ वटा राहदानी फोला परेको महानगरीय अपराध अनुसन्धान महाशाखाका प्रहरी वरिष्ठ उपरीक्षक सहकुलबहादुर थापाले जानकारी दिए।

घर्तीलाई अपराध महाशाखाको टोलीले बिहीबार पक्राउ गरेको थियो।

थापाका अनुसार उनले ओशो भिजन कन्सल्टेन्सी र हर्ट इन्टरनेसनलको निर्देशक भएको बताउँदै वैदेशिक रोजगारमा जान खोज्ने व्यक्तिलाई ठगेको उजुरी परेको थियो।

महाशाखामा तीन जनाले सात लाख रुपैयाँ ठगी गरेको निवेदन दिएको थापाले जानकारी दिए। घर्तीलाई विस्तृत अनुसन्धानका लागि महानगरीय प्रहरी परिसर टेकु पठाइएको थापाले बताए।