‘मिडिया आफ्नै कारणले अविश्‍वसनीय नहोस्’

काठमाडौं– सरकारका प्रवक्ता तथा सञ्चार तथा सूचना प्रविधिमन्त्री गोकुलप्रसाद बाँस्कोटाले मिडिया आफ्नै कारणले विश्वसनीय हुन नसकेको टिप्पणी गरेका छन् । मन्त्रालयमा बिहीबार आयोजित नियमित पत्रकार सम्मेलनमा सञ्चारकर्मीहरुले राखेका जिज्ञासाको जवाफ दिने क्रममा उनले यस्तो टिप्पणी गरेका हुन् ।

‘मिडिया आफ्नै कारणले अविश्वसनीय नहोस् । कसले कुन इन्ट्रेस्टमा रिपोर्टिङ गर्छ, एकपक्षीय रुपमा त्यसैको पक्षमा समाचार लेख्ने काम भइरहेको छ,’ उनले भने ।

सञ्चार मन्त्रालयले हालै निजी कम्पनी एनसेललाई फ्रिक्वेन्सी दिएको बारे सञ्चारकर्मीले राखेको जिज्ञासामा उनले यस्तो आरोप लगाएका हुन् । ‘पहिलोपल्ट फ्रिक्वेन्सीको अक्सन भएको छ । यत्तिकै कसैलाई दिइएको होइन । तर, यहाँ तथ्य तोडमोड गरियो । सबै पाटो लेखिएन । कसैले अक्सनमा भाग लिएन भनेर किन टाउको दुखाउनु ? बरु आफैं भाग लिनु नि,’ मिडिया हाउसप्रति लक्षित गर्दै बाँस्कोटाले भने ।

उनले थपे, ‘पहिलोपल्ट हावाबाट ९० करोड रुपैयाँ आएको छ, सकारात्मक सोचौं न । ९० करोडले ३० वटा स्कुल बन्छन्, ३० वटा स्वास्थ्य चौकी बन्छन् । १५ बेडका ३ वटा अस्पताल बन्छन् ।’

स्मार्ट टेलिकमले अक्सनमा भाग नलिएको बारेमा प्रष्ट्याउँदै उनले भने, ‘स्मार्टले २ अर्ब ३४ करोड सरकारलाई तिरेको छैन । उसको लाइसेन्स खारेज भइसकेको छ । लाइसेन्स नै नभएको कम्पनीले कसरी अक्सनमा भाग लिन्छ ? भाग लिइदेओस् भन्ने चाहेको भए त्यो पैसा तिरिदिएको भए हुन्थ्यो नि त ।’

मिडिया मालिकले समाचारबाहेक अरु बिजनेस पनि गरिरहेको आराेप लगाउँदै सञ्चारमन्त्री बाँस्कोटाले भने, ‘मिडिया सञ्चालकले भने हुन्छ– समाचारबाहेक के के बिजनेस गर्नुहुन्छ ?’