प्रक्रिया झन्झटिलो हुँदा पीडितले न्याय पाउन सकेनन्ः न्यायाधीश महरा

भैरहवा– कानुन पर्याप्त भए पनि प्रक्रिया झन्झटिलो हुँदा वास्तविक पीडितले समयमै न्याय पाउन नसकेको एक न्यायाधीशले बताएका छन् । महिला, कानुन र विकास मञ्चले भैरहवामा आयोजना गरेको जिल्लास्तरीय लैंगिक हिंसाविरुद्धको ५ दिने कार्यशाला उद्घाटन गर्दै जिल्ला अदालत रुपन्देहीका प्रमुख न्यायाधीश धनसिंह महराले भने, ‘हाम्रो कानुनी प्रक्रिया अत्यन्तै झन्झटिलो छ । समयमा फैसला कार्यान्वयन हुन सकिरहेको छैन । पीडितले समयमै क्षतिपूर्ति पाउन सकिरहेका छैनन् । तरपनि विगतमा भन्दा धेरै सुधार भएको छ ।’

उनले लैगिंक हिंसा विरुद्धका कानुन पीडितको लागि नभएको र त्यसको दुरुपयोग भएको भन्दै चिन्तासमेत व्यक्त गरे । उनले भने, ‘फोन, म्यासेज गर्ने, साथी बन्ने–बनाउने अनि पछि के कुरामा चित्त बुझ्दैन– बलात्कार, हिंसा जस्ता मुद्दा हाल्ने प्रवृति बढेको छ । यस्तै गतिविधि भइरहे यसले समाजमा ठूलो विसंगति निम्त्याउँछ ।’

जिल्ला न्यायाधीश मातृकाप्रसाद मरासिनीले महिला विरुद्धको हिंसालाई नियन्त्रण गर्न अहिलेको कानुन पर्याप्त भए पनि त्यसको कार्यान्वयनमा सबैको सहकार्य जरुरी रहेको बताए । अधिवक्ता सविन श्रेष्ठले संवैधानिक हिसाबले अपराध पीडित संरक्षण ऐन जस्तो महत्वपूर्ण कानुन भए पनि कार्यान्वयनको सवालमा कमजोर अवस्था रहेको बताए ।

महिला, कानुन र विकास मञ्चका प्रदेश संयोजक अधिवक्ता नगेन्द्र बस्यालले लैंगिक हिंसा समानता, विकास र शान्तिको बाधक भएको बताउँदै महिला विरुद्धको भेदभाव उन्मूलनको लागि सबै पक्षको एकता र सहकार्य जरुरी रहेको बताए ।