सिन्धुपाल्चोक बस दुर्घटना : मृतककाे संख्या १५ पुग्यो (नामसहित)

काठमाडौं- सिन्धुपाल्चोकमा आज (आइतबार) बिहान भएको बस दुर्घटनामा मृत्यु हुनेको संख्या १५ पुगेको छ।

दोलखाको कालिञ्चोकबाट भक्तपुर आउँदै गरेको बा ४ ख ४४६८ नम्बरको यात्रु बस सुनकोसी गाउँपालिका वडा ७ स्थित स्वाँरा मोडमा दुर्घटना भएको हो।

घटनास्थलमै १२ जनाको र ३ जनाको उपचारका क्रममा अस्पतालमा मृत्यु भएको प्रहरीले जनाएको छ। दुर्घटनामा १८ जना घाइते छन्।

मृतकमध्ये १४ जनाको सनाखत भएको छ। एक महिलाको नाम खुलेको छैन।

दुर्घटनामा दोलखा जिल्ला भिमेश्वर नगरपालिका–९ की ४२ वर्षिया लक्ष्मी श्रेष्ठ, रामेछाप उमाकुण्ड गाउँपालिका–४ प्रितीका २४ वर्षिय महेश तामाङ, काभ्रे बेथानचोक–५ का ३५ वर्षीय रामशरण खत्री र सोही स्थानकी उनकी श्रीमती ३५ वर्षिया मैया खत्री, लिशंखुपाखर गाउँपालिका–४ कि ५३ वर्षिया गंगामाया लामा, जुगल गाउँपालिका–७ याङ्लाकोटकी ७ वर्षिया सबिना तामाङ, सोही ठाउँकी ३० वर्षिया रेश्मा तामाङ, १५ महिनाकी रोशनी तामाङ छन्।

त्यस्तै बलेफी गाउँपालिका–५ चिम्लिङ की ३७ वर्षीया फूलमाया तामाङ र दोलखा शैलुङ्गेश्वरी गाउँपालिका फस्कुका १० वर्षीया रञ्जित बस्नेत, रामेछाप सुनपाती ६ कि जुनमाया तामाङ, मञ्जु तामाङ, सुकबहादुर तामाङ, र भक्तपुर सूर्यविनायक ८ कि ३८ वर्षिया चिनु बस्नेतको पनि मृत्यु भएको छ। करिब २४ वर्षिय एक महिलाको भने सनाखत हुन बाँकी छ।

दुर्घटनामा घाइतेहरुको काभ्रेको धुलिखेल र ह्याम्स अस्पताल काठमाडौंमा उपचार भइरहेको छ।

ह्याम्स अस्पतालमा लगिएका किरामीहरुको अवस्था गम्भीर रहेको र दुईजनाको टाउकोको शल्यक्रिया गरिएको बताइएको छ।

ब्रेक फेल भएको बस जबर्जस्ती चलाउँदा दुर्घटनामा परेको प्रहरीको अनुमान छ। सिन्धुपाल्चोकमा एक महिनाको बीचमा भएको यो दोस्रो दुर्घटना हो। गत कात्तिकमा सुकुटेमा बस दुर्घटना हुँदा १७ जनाको ज्यान गएको थियो।