सिन्धुपाल्चोक दुर्घटनामा ज्यान गुमाउनेहरु एकै गाउँका

काठमाडौं– सिन्धुपाल्चोकको खाडीचौर नजिक आइतबार विहान भएको बस दुर्घटनाका मृतक जुगल गाउँपालिका– ७ याङलाकोटका वासिन्दा भएको गाउँपालिका अध्यक्ष होमनारायण श्रेष्ठले जानकारी दिएका छन् ।

उक्त दुर्घटनामा दोलखाको कालिन्चोक मन्दिर दर्शन गरी भक्तपुर फर्कंदै गरेका १४ जनाको मृत्यु भएको छ। मृतकमध्ये अधिकांश भक्तपुरमा डेरा गरी बस्ने याङलाकोटका वासिन्दा रहेको जुगल गाउँपालिका– ७ का वडाध्यक्ष दिलकुमार लामाले जानकारी दिए ।

“बसमा दुई तीन जनाबाहेक सबै भक्तपुरमा डेरा गरी बस्ने हाम्रै गाउँका वासिन्दा रहेको बुझेको छु। म अहिले घाइते भेट्न धुलिखेल अस्पताल जाँदैछु,” लामाले भने।

प्रहरीले घटनास्थलबाट ८ महिला, तीन पुरुष, एक बालिका र दुई बालक गरी १४ जनाको शव बरामद गरेको छ । घाइते १८ जनाको उद्दार गरी स्थानीय सिन्धु सदाबहार अस्पताल, धुलिखेल अस्पताल र काठमाडौंतर्फ पाठाइएको छ।

शवहरु अझै घटनास्थलमा रहेको र मुचुल्का उठाउने काम भइरहेको प्रहरी निरीक्षक गणेश खनालले जानकारी दिए । उनका अनुसार मृतकहरुको अझै सनाखत भइसकेको छैन।

खाडीचौर– जिरी सडक खण्डको ६ किलोमा बस सडकबाट ५०० मिटर तल खस्दा भएको उक्त दुर्घटनाबारे थप अनुसन्धान भइरहेको प्रहरीले जनाएको छ।