तातोपानी भन्सार प्रमुखविरुद्ध साढे १० करोड भ्रष्टाचारको मुद्दा

काठमाडौं- अख्तियार दुरुपयोग अनुन्धान आयोगले तातोपानी भन्सार सिन्धुपाल्चोकका प्रमुख भन्सार अधिकृत कृष्णबहादुर बस्नेतविरुद्ध भ्रष्टाचारको मुद्दा दायर गरेको छ।

अख्तियारले बस्नेतविरुद्ध गैरकानुनी रुपमा सम्पत्ति आर्जन गरेको आरोपमा विशेष अदालतमा मुद्दा दर्ता गरेको हो।

उनीविरुद्ध गैरकानूनी रुपमा आर्जन गरेको रकम आफ्ना जेठान नबिनकुमार गौली एवम् उनको परिवारका अन्य सदस्यहरुको नाममा रहेका विभिन्न बैंक खातामा जम्मा गरेको देखिएको अख्तियारले जनाएको छ।

बस्नेतलाई १० करोड ५६ लाख ९१ हजार ६ सय ९ रूपैयाँ बिगो कायम गरी साबिक भ्रष्टाचार निवारण ऐन, २०१७ अनुसार भ्रष्टाचारको मुद्दा दायर गरिएकाे हाे।

त्यस्तै उनकी श्रीमती सबिता गौलीविरुद्ध बस्नेतको चलअचल सम्पत्ति जफत गर्ने प्रयोजनका लागि मुद्दा दायर गरेको छ।

त्यसैगरी जेठान नबिन गौली तथा नबिनकी श्रीमती सकुन्तला गौली र छोरा शुलभ गौलीविरुद्धसमेत अख्तियारले मुद्दा दर्ता गरेको सहायक प्रवक्ता गणेशबहादुर अधिकारीले जनाएका छन्।