पेट्रोलियम पाईपलाईनको उद्घाटनसँगै सस्तियो इन्धनको मूल्य

बहुप्रतिक्षित नेपाल–भारत अन्तरदेशीय पेट्रोलियम पाइपलाइनको मंगलबार नेपाल र भारतका प्रधानमन्त्रीले संयुक्त रुपमा उदघाटन् गरेका छन् । 

पाईपलाईन उद्घाटनसंगै नेपाल आयल निगमले मंगलबारदेखी लागू हुने गरी पेट्रोल, डिजेल र मट्टितेलको मूल्य प्रतिलिटर दुई दुई रुपैयाँ घटाएको छ । 

पाईपलाईनको नेपालका प्रधानमन्त्री केपी शर्मा ओलीले सिंहदरवार र भारतिय प्रधानमन्त्री नरेन्द्र मोदीले दिल्लीको हैदराबाद हाउसबाट स्विच थिचेर उद्घाटन गरेका हुन् । 

दुई प्रधानमन्त्रीले स्विच थिचेपछि अमलेखगञ्जस्थित आयल निगमको डिपोमा तेल खसेको थियो । 

दिल्लीस्थित प्रधानमन्त्री मोदीको कार्यालय, सिंहदरबारस्थित प्रधानमन्त्री ओलीको कार्यालय र मोतिहारीस्थित इण्डियन आयल कर्पोरेशनको डिपो तथा अमलेखगञ्जस्थित नेपाल आयल निगमको डिपोलाई प्रविधिमार्फत जोडेर भिडियो कन्फरेन्स पनि गरिएको थियो । 

यद्यपि, अमलेखगञ्ज डिपोमा भने प्राविधिक त्रुटीका कारण उदघाटन समारोहको प्रत्यक्ष प्रशारण हुन सकेन् । 

पाइपलाइनमा इन्धन पहिलेदेखि नै भरिएर राखिएको छ थियो । पाईपलाईनबाट आएको तेललाई बोत्तलमा राखेर भारतिय आयल कर्पोरेशनका कार्यकारी निर्देशक जेपी सिन्हाले नेपाल आयल निगमका कार्यकारी निर्देशक सुरेन्द्र पौडेललाई हस्तान्तरण गरेका थिए । 

पाईपलाईनको फाईदा
पाइपलाइनबाट इन्धन आएपछि सबैभन्दा ठूलो उपलब्धि स्थलमार्ग अवरुद्ध हुँदा पनि ईन्धनको आपूर्ति रोकिने छैन । 

अहिले नेपालका लागि आवश्यक कुल इन्धनमध्ये करिब ७० प्रतिशत भारतको बरौनीस्थित डिपोबाट ट्यांकरमा अमलेखगञ्जको डिपोसम्म ल्याईन्छ । दैनिक करिब चार हजार किलोलिटर इन्धन ढुवानीका लागि करिब ३०० वटा ट्यांकरको प्रयोग हुन्छ । पाइपलाइनबाट इन्धन आएपछि इन्धन ढुवानीमा वार्षिक करिब रु ५० करोड बचत हुने निगमले जनाएको छ । 

निगमले ढुवानी गराउँदा प्रतिलिटर दुई रुपैयाँ ५० पैसा ट्यांकर व्यवसायीलाई उपलब्ध गराउँदै आएको छ । पाईपलाईन संचालनमा आएपछि इन्धन चोरी, चुहावट र मिसावटजस्ता घटना पनि रोकिने बताइएको छ । 

भारत सरकारको सहयोगमा करिब १६ महिनाअघि मोतिहारी–अमलेखगञ्ज पाईपलाईन विस्तारको काम सुरु गरिएको थियो । कुल ६९.७ किलोमिटर लम्बाई रहेको मोतिहारी–अमलेखगञ्ज

पाईपलाईनको विस्तारमा भारत सरकारले तीन अर्ब २४ करोड भारतीय रुपैया खर्चिएको छ । मोतिहारीबाट रक्सौलसम्म ३३.७ र रक्सौलदेखी अमलेखगञ्जसम्म ३६.२ किलोमिटर दुरी छ । 

आयोजना आरम्भका क्रममा कुल लागतको ७० प्रतिशत भारतले र ३० प्रतिशत नेपालले ब्यहोर्ने भनिए पनि पछिल्लो समय सबै रकम भारत सरकारले खर्च गरेको हो ।

सुरुवातमा आयोजनाको कुल लागत २ अर्ब ७५ करोड भारतिय रुपैयाँ रहे पनि बाराको जीतपुर, परवानीपुर र पर्साको रजत जयन्ती चोकमा घरटहरा भत्काउन स्थानीयले नमानेपछि अत्याधुनिक मेसिनबाट जमिनमुनि गहिरो खाडल बनाई पाईप विस्तार गर्ने क्रममा ४९ करोड भारतीय रुपैयाँ थप लागेको हो ।