जी–७ बैठकमा इरानी विदेशमन्त्री पुगेपछि...

काठमाडौं- इरानी विदेशमन्त्री मोहम्मद जावेद जरिफ जी-७ सम्मेलनमा सहभागी भएका छन् ।

फ्रान्समा आइतबार सुरु भएको सात राष्ट्रको सम्मेलनमा जरिफ सहभागी भएको बीबीसीले जनाएको छ । बैठकमा जरिफ सहभागी भएपछि अमेरिकी टोली आश्चर्यमा परेको अन्तर्राष्ट्रिय सञ्चार माध्यमहरूले जनाएका छन् । 

जी-७ (ग्रुप अफ सेभेन) संसारका सबैभन्दा ठूला अर्थतन्त्र भएका सात राष्ट्रको संघ हो । यसमा अमेरिका, क्यानडा, फ्रान्स, जर्मनी, इटली, जापान र यूके आबद्ध छन् । 

अमेरिकाले सन् २०१५ मा इरानको आणविक गतिविधिलाई सीमित गराउनेसम्बन्धी सम्झौता फिर्ता हुने निर्णय गरेपछि यी दुई देशबीचको सम्बन्ध बिग्रिएको छ । त्यसयता अमेरिकाले इरानमाथिको आर्थिक प्रतिबन्ध कडा पारेको छ भने इरानले त्यसको प्रतिउत्तरमा पारमाणिक गतिविधि बढाइरहेको छ । 

अमेरिका र इरानबीच तनाव बढिरहेका बेला इरानी विदेशमन्त्री जी-७ बैठकमा सहभागी हुनुलाई अर्थपूर्ण ठानिएको छ ।