गाईजात्रा सम्पन्न

भक्तपुर - भक्तपुरमा साताव्यापी रुपमा मनाइने गाईजात्रा पर्व आजबाट सम्पन्न भएको छ। जनैपूर्णिमाका दिन तलेजुको पूजा गरी साँझ गाई निकालेपछि शुरु भएको भक्तपुरको गाईजात्रापर्व आज तलेजुको पूजा गरेर सम्पन्न भएको हो। 
    
गाईजात्राको दिन दिवङ्गत व्यक्तिको सम्झनामा गाईजात्रा निकालिने परम्परा रहेपनि अन्य दिनमा भने घिनताङघिसी नाच र व्यङ्ग्य प्रस्तुत गरेर गाईजात्रा मनाइने गरिन्छ। जात्रा समापनका क्रममा आज दरबार क्षेत्रमा घिनताङ घिसी नाच, हनुमान नाच, माकप्याख नाच, जङ्गली नाच, काटुन, प्ले कार्ड, प्रदर्शन गर्दै टोल टोल घुमाइएको थियो। भैरव मन्दिरमा नेवारी धोती हाकुपटासी लगाएर लामबद्ध सयौ महिलाले टोलटोल घुमेर बत्तीसमेत दिएका थिए।

आज श्रीकृष्णजन्माष्टमी समेत रहेकाले नारायणको पूजा गरी नारायण बत्ती बालेर भक्तपुरका बालबालिका एवं युवाले टाउँको, हात र शरीरमा पालाको बत्ती बालेर सूर्यमढीदेखि दत्तात्रय, सुकुलढोका, तौमढी, वंशगोपाल, इनाचो दरबार क्षेत्र हुँदै पुनः सूर्यमढी परिक्रमा गरेका थिए। टोलटोलबाट निकालिएका विभिन्न नाच नगर परिक्रमा गराई साँझ तलेजुको जात्रा गरेपछि गाईजात्रा सम्पन्न भएको थियो।