आईसीसी महिला विश्वकप क्रिकेट आजबाट सुरु हुँदै

काठमाडौं– आईसीसी महिला टी २० विश्वकप आजबाट दक्षिण अफ्रिकामा सुरु हुँदैछ। हरेक दुई वर्षमा हुने विश्वकप प्रतियोगिता आजबाट सुरु हुन लागेको हो। 

आगामि फेब्रुअरी २६ तारिखसम्म हुने विश्वकपको पहिल खेलमा आज राति आयोजक दक्षिण अफ्रिकाले श्रीलंकाको सामना गर्नेछ। यो खेल नेपाली समयअनुसार राति पौने ११ बजेबाट केप टाउनमा सुरु हुने आयोजकले जानकारी दिएको छ।

यसअघि सन् २०२० मा अष्ट्रेलियामा भएको विश्वकपको फाइनलमा भने भारतलाई हराउँदै घरेलु टिमले उपाधि जितेको थियो। र, अष्ट्रेलिया विश्वकपको सबैभन्दा धेरै उपाधि जितेको देश पनि हो। आठ संस्करण सम्पन्न हुँदासम्म उसले पाँच उपाधि जितिसकेको छ।

अष्ट्रेलियाले पहिलो खेल भोलि राति पौने ११ बजे न्युजिल्यान्डविरुद्ध खेल्नेछ। तर भोलिको पहिलो खेलमा भने इंग्ल्यान्डले वेस्ट इन्डिजको सामना गर्नेछ।

महिला टी–२० क्रिकेट विश्वकपमा १० टिमको सहभागीता रहने गर्दछ। यि टिमलालाई दुई समूहमा विभाजन गरिएको छ। समूह ए मा अष्ट्रेलिया, बंगलादेश, न्युजिल्यान्ड, दक्षिण अफ्रिका र श्रीलंका रहेका छन्।

त्यस्तै, समूह बी मा इंग्ल्यान्ड, भारत, आयरल्यान्ड, पाकिस्तान र वेस्ट इन्डिज रहेका छन्।