चेन्नईमाथि राजस्थानको संघर्षपूर्ण जित

काठमाडौं- इण्डियन प्रिमियर लिग (आइपिएल) अन्तर्गत राजस्थान रोयल्सले चेन्नई सुपर किंग्सलाई पराजित गरेको छ।

जस बटलरको अर्धशतकमा राजस्थान रोयल्सले बुधबार आइपिएलमा चेन्नई सुपर किंग्सलाई संघर्षपूर्ण खेलमा तीन रनले पराजित गरेको हो। बटलरको ३६ बलमा ५२ रनमा राजस्थानले पहिले ब्याटिङ गर्दै आठ विकेटमा १ सय ७५ रन बनाएको थियो।

त्यसमा सिमरन हेटमारको नटआउट ३० रनको पनि योगदान रह्यो। चेन्नईलाई जितसम्म पुग्न सन्दीप शर्माको अन्तिम ओभरमा २१ रन चाहिएकोमा त्यसलाई पूरा गर्न सकेन।

अन्तिम ओभरमा दुई वाइडपछि महेन्द्रसिंह धोनीले दुई छक्का प्रहार गरे र अन्तिम बलमा पाँच रन चाहिएको थियो। त्यसमा एकै रन मात्र बन्यो र चेन्नईले ६ विकेटमा १ सय ७२ रन मात्र बनाउन सक्यो।

यो खेलपछि राजस्थानले तेस्रो जित हासिल गरेको छ। राजस्थान ४ खेलमा ६ अंकसहित शिर्ष स्थानमा उक्लिएको छ। त्यस्तै चेन्नईको भने यो दोस्रो हार हो। चेन्नईको ४ खेलमा ४ अंकसहित चौथो स्थानमा रहेको छ।