रोनाल्डोले पूरा गरे ५०० लिग गोल

काठमाडौं– पोर्चुगलका फरवार्ड खेलाडी क्रिस्टियोनो रोनाल्डोले ५०० लिग गोल पूरा गरेका छन्। बिहीबार रातिको खेलमा उनले साउदी प्रो लिगको क्लब अल नासरबाट ह्याट्रिकसहित चार गोल गर्दै लिगमा ५०० गोलको आँकडा पूरा गरेका हुन्।

उनले अल वेहदाको मैदानमा घरेलु टिमविरुद्ध खेलको २१ औं मिनेटमा पहिला गोल गरेका थिए। रोनाल्डोले ४० औं मिनेटमा दोस्रो गोल गरेका हुन्। पहिलो हाफमा दुई गोल गरेका उनले दोस्रो हाफमा पनि दुई गोल नै गरे।

खेलको ५३ औं मिनेटमा पेनाल्टीमार्फत् गोल गर्दै उनले ह्याट्रिक पूरा गरेका थिए। त्यस्तै, रोनाल्डोले ६१ औं मिनेटमा व्यक्तिगत अन्तिम गोल गरे। साउदी प्रो लिगको गएरातिको यो खेलमा उनले सबै गोल गरेका थिए।

यो जितसँगै अल नासर लिगको शीर्षस्थानमा रहेको छ। समान ३७ अंक भएको अल शबाब भने दोस्रो स्थानमा रहेको छ। १६ टिम सम्मिलत लिगमा अल नासरले १६ खेल पूरा गरेको छ।