ए डिभिजन लिगमा एउटा क्लबले पाँच विदेशी खेलाडी राख्‍न पाउने

काठमाडौं – आगामी फागुन १९ गतेबाट काठमाडौंमा सुरु हुने सहिद स्मारक ए डिभिजन लिगमा एउटा क्लबले पाँच जनासम्म विदेशी खेलाडी राख्न पाउने भएको छ। अखिल नेपाल फुटबल संघ एन्फाले बुधबार क्लबहरुसँग बैठक गर्दै यस्तो निर्णय गरेको हो।

उसले बिहीबार १४ क्लबसँग छलफल गरेको थियो। नेपाली राष्ट्रिय टिमका सदस्यसिहित ए डिभिजनका धेरै खेलाडी रोजगारीका लागि विदेशीरहेको अवस्थामा ए डिभिजनल क्लबले विदेशी खेलाडीको कोटा थप गर्न माग गरेका थिए। अब नियम अनुसार क्लबहरुले पाँच जनासम्म विदेशी खेलाडी क्लबमा राख्ने पाउने छन्। तर एक पटकमा चार जनालाई मात्र खेलाउनु पर्ने छ।

क्लबले चार मात्र विदेशी खेलाडीले प्लेइङ ११ मा खेलाउन सक्ने भएको हो। यदी कुनै क्लबले पाँचै खलाडी नियुक्त गरेको अवस्थामा एक विदेशि खेलाडी बेञ्चमा बस्नुपर्ने छ। पछिल्लो एक वर्षभन्दा कम समयमा ३० भन्दा धेरै नेपाली फुटबल खेलाडी विदेशिएको तथ्यांक रहेको छ। नेपालमा फुटबल गतिविधि नभएपछि र खेल्ने वातावरण नभएपछि खेलाडी विदेशिएका हुन्।

यसरी खेलाडी विदेशिएपछि ए डिभिजन क्लबमा पनि अनुभवी खेलाडीको अभाव हुन थालेको छ। आगामि फागुन १९ गतेबाट सुरु हुने लिग डबल राउन्ड रोबिन शैलिमा हुनेछ। त्यसका लागि एन्फाले पाँचौ चरण सम्मको लिग तालिका सार्वजनिक गरिसकेको छ।