काठमाडौंसहित देशका छुट्टाछुट्टै चार स्थानमा आगलागी

काठमाडौं- देशका विभिन्न चार स्थानमा आगलागी भएको छ। ओखलढुंगा, मानेभन्ज्याङ गाउँपालिका-५ मानेभन्ज्याङ बजार बस्ने ६० वर्षीय रण बहादुर आले मगरको घरमा विद्युत सर्ट भई मंगलबार साँझ आगलागी हुँदा घरभित्र रहेको काठपातलगायत अन्य सामानहरु समेत गरी करिब ३ लाख रूपैयाँ बराबरको धनमाल जलेर नष्ट भएको छ।  

सप्तरी, सुरूङगा नगरपालिका-९ बैरबना बस्ने ६० वर्षीय बिन्देश्वर यादव र ४५ वर्षीय सैनी यादवको घरगोठमा सोही ठाउँ बस्ने ३५ वर्षीय वीरेन्द्र यादवले आगजनी गर्दा दुवै जनाको घर जलेर करिब १ लाख रुपैँया बराबरको धनमाल नष्ट भएको छ। आगजनी गर्ने वीरेन्द्रलाई प्रहरीले नियन्त्रणमा लिएको छ। 

काठमाडौं, काठमाण्डौं महानगरपालिका-१४ कलंकी सुनारगाँउस्थित गुल्मी तामघास नगरपालिका-२ घर भएका ३४ वर्षीय शिव वेलवासेलेको खाजा पसलमा विद्युत सर्ट भई मंगलबार राति आगलागी भएको छ। आगलागीबाट भएको क्षतिको विवरण हाल खुलेको छैन। 

यसैगरी काठमाडौं,  काठमाडौं महानगरपालिका-७ गौरिघाँट लाहुरोटोल डेरा गरी बस्ने कैलाली टिकापुर नगरपालिका-१ घर भएका ४५ वर्षीय कर्ण बहादुर चौलागाईको बा.८७ प६७८० नम्बरको मोटरसाइकलमा मंगलबार राति आगलागी हुँदा मोटरसाइकलको अगाडिको भाग र सिट पूर्ण रुपमा जलेर नष्ट भएको छ।   

प्रहरीले स्थानीय बासिन्दा र दमकलको सहयोगमा आगलागी नियन्त्रणमा लिनुको साथै यस सम्बन्धमा थप अनुसन्धान गरिरहेको छ।