यू–२० साफमा आज नेपालले भुटानको सामना गर्दै

काठमाडौं – बंगलादेशको ढाकामा जारी यू २० महिला साफ च्याम्पियनसिपअन्तर्गत आज आइतबारको खेलमा नेपाली टिमले भुटानको यू २० टिमसँग सामना गर्दैछ।

ढाकाको वीर सहिद श्रेष्ठ सिपाही मोस्तफा कमल रंगशालामा आज हुने आफ्नो दोस्रो खेलमा नेपालले भुटानको सामना गर्न लागेको हो।

च्याम्पियनसिपको पहिलो खेल नै हारबाट सुरु गरेको नेपाललाई यो खेलमा जित निकाल्न दबाब पनि रहेको छ। नेपालले फाइनलमा स्थान बनाउनका लागि अब बाँकी दुवै खेलमा जित नकिाल्नै पर्ने दबाब पनि छ। यसअघि भारत र बंगलादेशले समान १–१ जित निकालेर समान ३–३ अंक पनि जोडिसकेका छन्।

नेपालले भने आफ्नो पहिलो खेलमा नै आयोजक बंगलादेशसँग ३–१ को हार बेहोरेको थियो। उपाधिको लक्ष्यका साथ बंगलादेश होमिएको नेपाली टिमले हार बेहोरेको हो। प्रतियोगितामा पाकिस्तान, माल्दिभ्स र श्रीलंकाले भाग नलिएपछि चार टोलीको मात्र सहभागीता रहेको छ।

सहभागी हुनेमा नेपालसँगै बंगलादेश, भारत र भुटान रहेका छन्। गएको शुक्रबार नेपालले बंगलादेशसँग खेलेको थियो भने आज नेपालले भुटानसँग खेल्दैछ। मंगलबार हुने तेस्रो खेलमा नेपालले भारतसँग पनि खेल्नेछ।

सिंगल राउन्ड रोबिनका आधारमा हुने लिग चरण सकिएपछि शीर्षस्थानका दुई टिमले फाइनलमा आगामि बिहीबार प्रतिस्पर्धा गर्नेछन्।